Senati amerikan e ka konfirmuar Kristi Noem si sekretaren e sigurisë së vendit, duke e vënë guvernatoren e Dakotës së Jugut në krye të një agjencie kyçe, si pjese e përpjekjeve të Presidentit Donald Trump për të goditur emigracionin e parregulltë.
Ligjvënësit votuan 59-34 të shtunën për të konfirmuar Noem, e cili u bë personi i katërt në administratë që mori dritën jeshile pas Pete Hegseth si sekretar i mbrojtjes, senatorit Marco Rubio si sekretar i shtetit dhe John Ratcliffe si drejtor i agjencisë së spiunazhit të CIA-s.
Që nga viti 2019, Noem ka shërbyer si guvernatorja e parë femër e Dakotës së Jugut dhe është një kongresmene me katër mandate. Ajo tani do të drejtojë Departamentin e Sigurisë Kombëtare, i cili mbikëqyr emigracionin, doganat, menaxhimin e emergjencave dhe shërbimin e sigurisë, raporton Al Jazeera.
“Ne duhet të sigurojmë kufijtë tanë kundër trafikimit të paligjshëm dhe imigrimit. Ne duhet të mbrojmë infrastrukturën tonë kritike për t’u siguruar që jemi të mbrojtur nga sulmet kibernetike, t’u përgjigjemi fatkeqësive natyrore dhe gjithashtu terrorizmit, “u tha Noem senatorëve gjatë seancës së konfirmimit të saj.
“Largimi i të huajve kriminalë nga rrugët tona dhe jashtë vendit do t’i ndihmojë komunitetet amerikane të jenë përsëri më të sigurta,” tha ajo.
Noem tha se fokusi i saj do të drejtohet gjithashtu drejt “terrorizmit vendas”, dhe premtoi se nuk do të ketë “paragjykim politik” gjatë menaxhimit të ndihmës në rast fatkeqësie.
Gjatë pandemisë COVID-19, ajo hodhi poshtë mandatet e maskave dhe distancimin social. Trump gjithashtu e lavdëroi më parë atë për dërgimin e trupave të Gardës Kombëtare në kufirin SHBA-Meksikë.
