Komuna e Dragashit e ka konfirmuar prezencën e murtajës afrikane në territorin e saj.
Përmes një njoftimi në Facebook nga kjo komunë kanë bërë të ditur se tashmë zyrtarisht është konfirmuar Murtaja Afrikane e Derrit.
“Të dashur qytetarë të Komunës së Dragashit, ju informojmë se në territorin e Komunës sonë tashmë edhe zyrtarisht është konfirmuar MURTAJA AFRIKANE e derrit”, thuhet në njoftim.
Derisa thuhet se janë duke u ndërmarrë të gjitha veprimet e nevojshme me qëllim të eliminimit të kësaj sëmundjeje.
“Shoqata e Gjahtarëve “ Dhia e egër” së bashku me Drejtorinë e Bujqësisë, Pylltarisë, Inspektimit dhe Zhvillimit Rural në Dragash, në bashkëpunim me të gjitha organet kompetente shtetërore, janë duke ndërmarrë të gjitha veprimet e nevojshme në terren me qëllim të eliminimit të kësaj sëmundjeje dhe me shpresën për uljen e dëmeve. në fushën e faunës së komunës sonë”.
“Ne do t’ju japim disa simptoma të kësaj sëmundjeje që ekziston vetëm te derrat, e cila nuk transmetohet te kafshët e tjera, madje edhe te njerëzit, por duhet pasur kujdes maksimal sepse nuk kemi pasur raste të tilla deri më tani”, thuhet tutje.
Ndryshe, Murtaja Afrikane e Derrit është sëmundje ngjitëse që shkakton ethe hemorragjike tek derrat e butë dhe derrat e egër, ndërsa përcillet me letalitet të lartë deri në 100 përqind.
Teksa Agjencia e Ushqimit dhe Veterinarisë, e kishte konfirmuar rastin e parë të prezencës se sëmundjes Murtaja Afrikane e Derrit (MAD) në komunën e Kllokotit./teve1.info./
