Skuadra e Dritës ka njoftuar të martën se derbi me Gjilanin do të zhvillohet pa praninë e tifozëve. Ekipi i “Intelektualëve” njëashtu në njoftim tregon se ky vendim është edhe i prerë nga stacioni policor në Gjilan, shkak infrastrukturës e cila nuk ofron aspak siguri.
Derbi i Anamorëves zhvillohet ditën e mërkurë nga ora 15:00, në stadiumin me bari sintetik, dhe i takon xhiros së shtatë në Superligën e Kosovës.
Te Drita kanë bërë përpjekje që të paktën të jenë prezenca e fëmijëve të shkollës së futbollit, por vendimi i policisë ka qenë i prerë shkak infrastrukturës jo të përshtatshme që ka stadiumi.
“Njoftojmë të gjithë sportdashësit, veçanërisht tifozët tanë ‘Intelektualët’ se me vendim të prerë nga Stacion Policor në Gjilan jemi urdhëruar që ndeshja derbi FC DRITA – SC Gjilani të zhvillohet pa asnjë pjesëmarrës në tribuna. Klubi ynë ka bërë përpjekje që ndeshja të zhvillohet të paktën me prezencë të fëmijëve të shkollës sonë të futbollit, sepse kemi konsideruar që ata nuk përbëjnë rrezik për ndonjë incident dhe pjesëmarrja e tyre vetëm sa do t’ia shtonte bukurinë derbit. Por, kërkesa jonë nuk është aprovuar me arsyetimin e policisë se për shkak të infrastrukturës jo të përshtatshme dhe sigurisë në stadiumin ndihmës ndeshja duhet të zhvillohet pa tifozë. Policia kërkoi mirëkuptimin e qytetarëve, ndërsa ne si klub shprehim keqardhje për mungesën e tifozëve dhe kërkojmë po ashtu mirëkuptimin tuaj”, thuhet në njoftimin e Dritës.
Drita për derbin tjetër ka paralajmëruar se në rast se nuk u lejohen tifozët, atëherë do të kërkojnë me ngulm ndërrimin e destinacionit për të pasur nga afër mbështetjen e tifozëve. /Tëvë1/
