Ditë pushimi të shtunën e patën protestuesit e komunës së Zubin Potokut.
Me vetëm kalimtarë të rastit, u shoqërua edhe Zubin Potoku në ditën e parë të vikendit.
Brenda perimetrit të sigurisë së objektit komunal, qëndronte Policia e Kosovës.
Derisa jashtë saj, të pozicionuar ishin pjesëtarë të KFOR-it.
Njësitet elitare të Policisë pati përgjatë rrugës që të dërgonte në këtë komunë, të vendosur në disa postblloqe.
E deri në orët e para të pasdites, në Leposaviq, dolën në rrugë një numër i paktë protestuesish.
Përballë tyre, sikur tash e gjashtë ditë, qëndronin pjesëtarët e KFOR-it.
Patrullat e Policisë së Kosovës, ndërkohë qarkullonin në rrugët që dërgojnë për tek komuna e Leposaviqit.
Në njërin prej postblloqeve të Policisë së Kosovës drejt Leposaviqit, po kontrollohen pjesa më e madhe e veturave me targa ilegale.
Numër më i madh i protestuesve serbë, ishte në Zveçan.
Ata ishin të përqendruar në tendat e vendosura ditë më parë, në mesin e të cilëve kishte edhe përfaqësues të Listës Serbe.
Në Zveçan, për dallim nga dy komuna tjera nuk pati patrulla të Policisë së Kosovës.
Kronika e realizuar nga gazetarja Florijeta Dernjani
