Javë më parë, Instituti GAP ka publikuar një raport pasqyrues për shpenzimin e buxhetit të komunave gjatë vitit 2022.
Mesatarja e shpenzimeve nga të gjitha komunat kap vlerën e 60% të mjeteve financiare, që del të jetë se shumica e komunave nuk kanë shpenzuar buxhetin e plotë.
Komuna e Prishtinës dhe e Fushë Kosovës kanë shpenzuar më së paku buxhet në investimet kapitale.
Derisa dy prej komunave që kanë shpenzuar mjetet financiare 100% janë Ferizaj dhe Malisheva.
E Drejtorit të Asociacionit të Komunave të Kosovës, Sazan Ibrahimi, sqaron vështirësit që kanë pasur komunat në shpenzimin e buxhetit.
Ndërkohë ai tregon se çfarë ndodh me buxhetin e mbetur.
“Mjetet financiare që nuk shpenzohen por që janë nga të hyrat vetanake, bazuar në Ligjin për Financat Publike, komunat mund t’i bartin në vitin vijues 2023, mirëpo kjo nuk mund të ndodhë për mjetet financiare që shkojnë në nivelin lokal nga niveli qëndror, në përkrahje të realizmit në projekte të ndryshme e që nuk mund të shpenzohen. Ato kthehen në buxhetin e Republikës së Kosovës”, tha Ibrahimi.
E për vështirësitë e shpenzimeve kapitale të komunave ka folur edhe drejtori i Institutit Kosovar për Qeverisje Lokale Valmir Gashi.
Përmes një përgjigje elektronike, ai rendit arsyet pse ka pasur ngecje në shpenzimin e mjeteve.
“Problemet kyçe dalin të jenë: planifikimi i projekteve, prona komunale si dhe proceset e prokurorimit. Por që secila komunë ka specifikat e saj, për disa komuna, sikurse Prishtina, Fushë Kosova, kjo lidhet me kapacitetin për të gjeneruar të hyra vetanake, ku një pjesë e konsiderueshme mblidhet në tre muajt e fundit të vitit dhe që nuk ka mundësi të shpallen procedura për shpenzim. Në disa komuna, projektet e planifikuara, nuk mund të realizohet si rezultat i problemeve në prona, e që kjo lidhet me planifikimin”, deklaroi Gashi.
Sipas raportit të thesarit del se pas 31 dhjetorit 2022, kanë mbetur rreth 90 milion euro të pa shpenzuara nga të hyrat vetanake.
Kronika e gazetares Valëza Sylejmani.