Komuna e Prishtinës ka njoftuar se IKSHPK ka dhënë leje për rihapjen e pishinës së Gërmisë, pas përfundimi të rezultateve të mostrave të ujit të marra më 23 korrik.
Në një komunikatë komuna ka thënë se shpreh shqetësime për deklarimet publike që shkaktuan konfuzion tek qytetarët ende pa dalë rezultatet aktive.
“Sot, më 25 korrik 2025, Instituti Kombëtar i Shëndetësisë Publike të Kosovës (IKSHPK) ka përfunduar analizat përfundimtare të mostrave të datës 23 korrik, dhe rezultatet kanë dalë brenda standardeve të përcaktuara sipas rregullores për cilësinë e ujit në pishina. Bazuar në këto rezultate, IKSHPK tash ka dhënë leje për rihapjen e pishinës. Kryeqyteti shpreh shqetësimin për komunikimet publike të parakohshme, të cilat krijuan alarm dhe konfuzion publik, në një moment kur analizat zyrtare ende nuk ishin finalizuar. Urojmë që praktika të tilla, që prekin drejtpërdrejt qytetarët, të shmangen në të ardhmen dhe çdo komunikim të bazohet vetëm në rezultate zyrtare përfundimtare nga institucionet përkatëse. Ju ftojmë të shijoni hapësirat e Gërmisë duke ju siguruar se do të vazhdojmë të jemi të përkushtuar ndaj transparencës dhe mbrojtjes së shëndetit publik”, thuhet nga komuna.
