Komuna e Prishtinës ka reaguar pas vdekjes së një burri që kishte rënë në një pusetë të hapur në Prishtinë më 9 gusht.
Në reagim thuhet, se ekipet e komunës kanë konstatuar se viktima ka rënë në pusetën në rrugën Prishtinë – Podujevë, rrugë kjo që është në kompetencë të Qeverisë së Kosovës dhe jo të komunës.
“Dëshirojmë të sqarojmë për publikun se është konstatuar nga ekipet tona dhe konfirmuar nga Policia e Kosovës, se puseta në të cilën ka rënë i ndjeri është në rrugën magjistrale Prishtinë – Podujevë. Kjo rrugë magjistrale nuk është në kompetencë të Kryeqytetit, por në kompetencë të Qeverisë së Republikës së Kosovës dhe pjesë e punimeve të menaxhuara nga Qeveria”, bëhet e ditur në reagim.
Komuna po ashtu, ka kritikuar deklaratat e përfaqësuesvë të Lëvizjes Vetëvendosje të cilët sipas tyre po tentojnë ta politizojnë këtë rast.
“Janë për keqardhje deklaratat e pavërteta nga përfaqësues të Lëvizjes Vetëvendosje të cilët këtë fatkeqësi të rëndë tentojnë t’a politizojnë dhe përmes shpifjeve tentojnë t’ia hedhin fajin organeve të Kryeqytetit”, theksohet në reagim.
Ndryshe, Policia e Kosovës përmes raportit 24-orësh ka njoftuar se ka ndërruar jetë burri që po trajtohej në Qendrën Klinike Universitare të Kosovës(QKUK), si pasojë e lëndimeve që kishte marrë pasi kishte rënë në një pusetë të hapur më 9 gusht./teve1.info/
