Që disa ditë qytetit i Vushtrrisë ka mbetur pa ndriçim publik.
Kjo për shkak se KEDS ka bërë shkyçjen e energjisë elektrike pas borxhit që kjo komunë i ka Kompanisë Kosovare për Distribuim me Energji Elektrike në Kosovë.
Kësisoj rrugët e qytetit dhe të disa fshatrave kanë mbetur në terr.
Kryetari i Komunës së Vushtrrisë, Ferit Idrizi ka treguar arsyet se pse nuk kanë mundur të bëjnë pagesën e rrymës.
“Kohëve të fundit jemi duke u ballafaquar me këtë problematik, pra me ndriçimin publik, KEDS e ka bërë shkyçjen në shumë lokalitete, qytete të Vushtrrisë, arsyeja është se nuk kemi pasur mjete me pagu faturat e shpenzuara. Krejt kjo ka derivuar si pasojë e kontratës kolektive, ku vetëm në vitin 2025 për kontratën kolektive përmbaruesi na ka marrë 3 milionë e 500 mijë euro, prej të cilave 250 mijë janë nga kategoria e shpenzimeve komunale”, tha ai.
Madje nga kjo komunë janë duke pritur një përgjigje nga Ministria e Financave për daljen nga kjo situatë.
“Të premten e kaluar ne kemi thirrur seancë të jashtëzakonshme të Kuvendit komunal dhe kemi marrë vendim unanim për rialokim të mjeteve të tejkalimit të te hyrave vetanake, kemi tejkaluar të hyrat vetanake për 350 mijë euro dhe nevojitet një vendim i Kuvendit që qato të hyra me ridestinuar, ne kemi ridestunar të hyrat ku 300 mijë euro për kompaninë e mbeturinave “Përparimi” për 3 muaj, nëntor, dhjetor dhe janar dhe 50 mijë euro për pagesë të ndriçimit publik. Tash vendimi është në zyrën e Ministrit të Financave dhe po presim që ministri i Financave me miratuar këtë vendi”, tha ai.
Tëvë 1 ka dërguar pyetje edhe tek Ministria e Financave por gjatë ditës nuk ka marrë përgjigje.
Kurse sipas drejtorit të Asociacionit të Komunave të Kosovës, Sazan Ibrahimi , kontrata kolektiv është duke i shkaktuar barrë financiare buxheteve komunale në vend.
“Analizat tona tregojnë se këto detyrime tashmë po prodhojnë humbje që arrijnë në qindra milionë euro dhe se kjo barrë financiare do të vazhdojë të rëndojë komunat edhe në vitet e ardhshme, duke cenuar stabilitetin e tyre buxhetor. Kontratat Kolektive po rrezikojnë funksionimin normal të komunave, duke penguar: ofrimin e shërbimeve publike, pamundësi në investime kapitale, zhvillimin lokal dhe mirëqenien e qytetarëve. AKK pret që pas funksionalizimit të institucioneve qendrore të ketë dialog të drejtpërdrejtë Qeveri–Komuna dhe sigurimin e burimeve financiare të domosdoshme, në mënyrë që komunat të mos hyjnë në bllokadë financiare në vitin 2026 dhe të mos rrezikojnë stabilitetin e tyre në të ardhmen”, u shpreh Ibrahimi.
Kontrata kolektive i obligon komunat të paguajnë benefite të caktuar mësimdhënësve në vend, duke filluar nga pagesa për shujta ushqimore, apo për shpenzimet e udhëtimit deri te paga shtesë pas pensionimit.
