Komuna e Prishtinës dhe Federata e Futbollit të Kosovës të martën janë dakorduar për të bashkëpunuar në ndërtimin e një stadiumi të ri të futbollit në kryeqytet. Siç ka njoftuar Federata e Futbollit, takimi që kanë mbajtur sot, kryetari i FFK-së, Agim Ademi, dhe kryetari i Prishtinës, Përparim Rama, kishte për qëllim koordinimin ndërinstitucional për ndërtimin e stadiumit.
Sipas njoftimit, “stadiumi i ri, i cili do të ndërtohet në Bërnicë, do të jetë i kategorisë së katërt dhe do t’i plotësojë të gjitha standardet dhe kushtet e nevojshme për organizimin e ndeshjeve ndërkombëtare, përkatësisht të ndeshjeve të ekipit kombëtar dhe klubeve në garat evropiane”.
“Ky stadium gjithashtu do të jetë një vend i përshtatshëm për organizimin e aktiviteteve tjera sportive dhe eventeve të ndryshme”, thuhet në njoftim.
Sipas dakordimit, FFK-ja do ta ketë përgjegjësinë për menaxhimin e stadiumit të ri, siç e ka tash për “Fadil Vokrrin”.
“Ata diskutuan po ashtu edhe për mirëmbajtjen e stadiumit ekzistues, gjendjen e fushës dhe organizimin e ndeshjeve kombëtare dhe të ekipeve që garojnë në Evropë”, bëhet e ditur në njoftim.
Të dy janë zotuar “që të krijojnë kushte sa më të mira për sportin në kryeqytet dhe të përkushtohen bashkërisht në organizimin sa më të mirë të klubeve të kryeqytetit”.
