Komuna e Prishtinës ka apeluar qytetarët për kujdes të shtuar gjatë lëvizjes, duke iu bërë thirrje të shmangin zonat e përmbytura dhe të raportojnë çdo situatë që paraqet rrezik për sigurinë publike.
Apeli vjen pas paralajmërimeve të Institutit Hidrometeorologjik të Kosovës për rrezik të vërshimeve si pasojë e reshjeve të shumta të shiut.
Në njoftimin zyrtar theksohet se institucionet përkatëse të kryeqytetit janë në gatishmëri të plotë për monitorimin e situatës dhe ndërhyrje sipas nevojës.
“Bazuar në informacionet zyrtare nga Instituti Hidrometeorologjik i Kosovës, njoftojmë qytetarët e Kryeqytetit se gjatë 24 orëve të fundit janë regjistruar mbi 25 mm/m² reshje shiu, ndërsa reshjet pritet të vazhdojnë edhe në ditët në vijim me intensitet të ndryshueshëm. Si pasojë, mund të ketë: vështirësi në qarkullimin rrugor, mbingarkesë të kanalizimit dhe ujërave atmosferike, grumbullim të ujit në zona urbane dhe nënkalime, rrezik për rrëshqitje lokale të dheut në zona të ndjeshme. Apelojmë te qytetarët që të tregojnë kujdes të shtuar gjatë lëvizjes, të shmangin zonat e përmbytura dhe të raportojnë çdo situatë që paraqet rrezik për sigurinë publike. Institucionet përkatëse të Kryeqytetit janë në gatishmëri të plotë për monitorimin e situatës dhe ndërhyrje sipas nevojës”, thuhet në njoftim.
Ndryshe, Instituti Hidrometeorologjik i Kosovës ka paralajmëruar se reshjet e shiut pritet të vazhdojnë dhe si pasojë mund të ketë vërshime lokale, probleme në komunikacion, vështirësi në sistemet e kanalizimit dhe pengesa në trafik.
