Kuvendi Komunal i Kaçanikut ka miratuar unanimisht vendimin për mbështetjen financiare të nënave lehona, një nga premtimet e para të kryetarit të komunës, Sabedin Vishi.
Sipas vendimit, çdo nënë lehonë do të përfitojë 200 euro, ndërsa zbatimi i kësaj mase do të nisë nga janari i vitit 2026.
Vishi e ka cilësuar këtë hap si një kontribut të rëndësishëm për fuqizimin e politikave sociale në komunë.
Ai ka theksuar se përkushtimi i institucioneve komunale do të vazhdojë të jetë i orientuar drejt familjes dhe fëmijëve.
“Premtimi im i parë si Kryetar i Komunës së Kaçanikut për mbështetjen e nënave lehona u miratua sot unanimisht në Kuvend. Zbatimi fillon nga janari i vitit 2026. Kujdesi për familjen dhe sidomos për fëmijët mbetet prioriteti ynë”, ka deklaruar Vishi.
Komuna e Kaçanikut ka bërë të ditur se detajet për kriteret dhe procedurat e aplikimit do të publikohen në kohë.
