Transportuesit më të mëdhenj ajrorë shtetërorë të Kinës kanë reaguar ndaj një propozimi të SHBA-së për t’i ndaluar ata të fluturojnë mbi Rusinë kur udhëtojnë për në ose nga SHBA-ja.
Pala amerikane ka thënë se fluturime të tilla u japin linjave ajrore kineze një avantazh të padrejtë në kosto ndaj transportuesve amerikanë, të cilët nuk mund të kalojnë nëpër hapësirën ajrore ruse.
Moska mbylli hapësirën ajrore ruse për transportuesit ajrorë amerikanë dhe shumicën e linjave ajrore evropiane në vitin 2022 në përgjigje të sanksioneve perëndimore për pushtimin e Ukrainës nga Rusia.
Air China, China Eastern dhe China Southern janë midis gjashtë linjave ajrore kineze që kanë paraqitur ankesa ndaj urdhrit të propozuar javën e kaluar për të ndaluar fluturime të tilla nga transportuesit kinezë, raporton AP.
China Eastern tha në dokumentin e paraqitur këtë javë në Departamentin e Transportit të SHBA-së se ndalimi i propozuar do të “dëmtonte interesin publik” dhe do të “shqetësonte udhëtarët” si nga Kina ashtu edhe nga SHBA-ja.
Koha shtesë e fluturimit do të rezultonte në kosto më të larta dhe çmime më të larta të biletave të avionit, gjë që rrit barrën mbi të gjithë udhëtarët, tha ajo.
