Autobusët me targa të Beogradit, vend-parkim e kanë një lokacion.
Kompania serbe që vepron në stacion të autobusëve në Mitrovicë të Veriut, emër i njohur për redaksinë, tash e shumë vite pronën e shfrytëzon duke paguar çmim jo në proporcion me hapësirën që i takon komunës.
Një marrëveshje të tillë me kompaninë, e kishte bërë partia Lista Serbe, e që ministër i Administrimit të Pushtetit Lokal, atë kohë ishte Goran Rakiq.
Televizioni ka tentuar të kontaktojë me kompaninë, por e njëjta nuk ka qenë e qasshme.
Kryesuesi i Kuvendit Komunal të Mitrovicës së Veriut, Nexhat Ugljanin thotë se sipas dokumenteve që ka komuna, vendimi për këtë kompani është marrë në kundërshtim me ligjin.
Ai thotë se kompania që vepron në stacionin e autobusëve, është e vëllait të ish-kryetarit të strukturave paralele serbe në Zubin Potok, e që para disa ditësh nuk i ka lejuar të parkohen kompanitë tjera që dërguan studentë nga veriu për të protestuar në Boegrad kundër Vuçiqit.
“I është dhënë kompanisë ‘Kollashin Prevoz’ vëllait të ish-kryetarit të Zubin Potokut, është dicka interesant që nuk kanë qenë tri oferta ka qenë vetëm një ofertë që faktikisht është shkelë edhe ligjshmëria. Kjo është fuqiza shumë si kompani dhe nuk i ka lejua kompanitë tjera turistike, mini busa apo autobusa të cilët kanë dërguar studentët në Beograd për protesta pa pagesë, nuk e kanë lejuar të parkohet, ndonëse si kuvend kemi rregullore që duhet t’iu ofrohet parking edhe kompanive tjera kushdo që është”, tha ai.
Në anën tjetër, Tëvë1 ka siguruar vendimin për dhënien në shfrytëzim të pronës që i takon komunës së Mitrovicës së Veriut, për kompaninë MTS.DOO, e cila paguan për vetëm 0.50 cent metrin katror, kontratë kjo e nënshkruar për 99 vite.
Në dokumentet e siguruara, shihet se vendimi është marrë nga Aleksandër Spiriq, ish-kryetar i komunës paralele serbe të Mitrovicës së veriut, në vitin 2020.
E njëjta ishte nënshkruar edhe nga Qeveria, gjegjësisht nga ish-zëvendëskryeministri dhe ministri i Administrimit të Pushtetit Lokal, Goran Rakiq.
Televizioni ka dërguar pyetje edhe në kabinetin e Qeverisë së Kosovës por edhe tek ministri aktual i ministrisë së Administrimit të Pushtetit Lokal, Elbert Krasniqi, por deri në publikimin e kronikës, nuk ka pranuar përgjigje.
