Punëtorët e KRM “PASTRIMI”, protestuan sot para Komunë së Prishtinës duke shfaqur pa kënaqësitë e tyre lidhur me fatin e kësaj ndërmarrje. Nga KRM “ Pastrimi”, kërkuan anulimin e tenderit për menaxhimin e mbeturinave nga operatori privat. Kurse nga ana tjetër Komuna e Prishtinës premtoi zgjidhje.
“7 ditë afat mos e ndal kthehemi prapë”.
E kështu edhe vepruan punëtorët e Kompanisë Regjionale të Mbeturinave “ Pastrimi” duke protestuar përsëri para Komunës së Prishtinës.
Kjo pasi Komuna para ca ditësh u kishte premtuar zgjidhje por ajo nuk u realizua.
“Pasi që më të 22 ishim këtu protestuam, kërkesat tona i informuam Bekim Brestovcin të gjithë janë të informuar për gjendjen në të cilën gjendet ‘Pastrimi‘. Kërkesat tona i kemi dorëzuar edhe me shkrim na premtuan një javë ditë që i bie të premten e kaluar me na dhënë një përgjigje, përgjigje nuk kemi marrë, isha para dy dite prapë këtu nuk e takova askënd”, ka thënë kryetari i shoqatës “Pastrimi” Ardian Krasniqi.
Kërkesat sipas Krasniqit janë ende të njëjtat.
“Të hiqet rregullorja faqe 14 neni 16 pika 3, ku thuhet se Komuna e Prishtinës mund të angazhojë kompani tjera për të i ndihmuar kompanisë “ Pastrimi”, në rast të vështërsive gjatë operimit. Kjo nënkupton edhe heqjen e tenderit të cilën e ka shpallë Komuna për 16.5 milion. Tender ky që e ndanë Prishtinën në 6 llote. Operatori i vetëm i mbeturinave të jetë vetëm KRM ‘Pastrimi’”.
Frika se do të mbesin pa punë ishte edhe këtë të mërkure e pranishme te punëtorët e KRM” PASTRIMI”.
“Këta të shkretë krejt kanë me mbet pa punë, për shkak politikës. Okupatori u kanë, masat e dhunshme janë ardh në këtë gjendje nuk na kanë lënë e sot vllaznia tonë mbesin pa punë”,ka deklaruar punëtori i kësaj kompanie.
“Stop më me këto korrupsione, me këto dallavere, të dërgojmë shtetin përpara, te dërgojmë pastrimin e qytetit përpara mos te zhytëm”, ka thënë Ahmet Hajdini-punëtorë në këtë kompani.
E në shenjë revolte, punëtorët sollën para Komunës edhe kamionët me të cilët punojnë.
“Ju kisha lut mundeni me ardh me pa gjendjen e automjetit nga afër . Faleminderit për mikpritjen që na ka bërë Komuna, që nuk janë të gatshëm me dal me i pa punëtorët e ‘Pastrimi‘ në çfarë gjendje janë më çfarë automjetesh operojnë”,ka deklaruar punëtori tjëtër, Sedat Rukovci.
Lidhur me fatin e punëtorëve të KRM “Pastrimi”, pas shpalljes së këtij tenderi , për televizionin ka folur drejtori i shërbimeve publike në kryeqytet, Bekim Brestovci.
“Po them që nuk ka asnjë arsye për asnjë brengë të asnjë punëtori të ndërmarrjes “ Pastrimi” sepse të gjithë ata do të mbesin në vendet e tyre të punës , sepse për të gjithë ata në Komunën e Prishtinës do të ketë punë të mjaftueshme dhe kontrata të mjaftueshme të cilët atyre u sigurojnë tutje mirëqenien e tyre ekonomike dhe sociale”, ka thënë ai.
Në fund të protestës, punëtorët e KRM” Pastrimi” treguan se nuk do të ndalen deri në realizimin e kërkesave të tyre.
