Po i kontrollojnë kamionët që do t’i vozisin vet.
Kjo pasi, Ndërmarrjes “Pastrimi” të enjten iu dorëzuan gjashtë nga tetë kamionët që janë blerë nga Komuna e Prishtinës.
E vlera e tyre është 1.4 milionë euro.
Drejtori i Shërbimeve Publike në Komunën e Prishtinës, Bekim Brestovci përmendi edhe numrin e madh të kontejnerëve për të cilat pret që kompania t’i shpërndajë sa më shpejtë.
“Shpresoj që kjo të jetë vetëm një fillim i mbarë i ndihmës së cilës Komuna po e jep edhe gjatë vitit 2025 për ndërmarrjen “Pastrimi”, ne tani më kemi edhe një stok prej 500 kontejnerëve të cilët pritën që shumë shpejtë ndërmarrja e “Pastrimit” të filloi dhe t’i shpërndajë në lokacione të ndryshme të kryeqytetit”, ka thënë ai
Për dorëzimin e gjashtë kamionëve, foli edhe vet kryeshefi i kompanise “Pastrimi”, Petrit Reçica.
“Fatmirësisht edhe ne si kompani veç i kemi arrit me rrit numrin e kamionëve, ne veç i kemi ble 10 dhe po presim edhe kjo pjesë e flotës me u shtu, normalisht edhe pjesën ekzistuese me sjell në gjendje më të mirë dhe me pas një shërbim sa më të mirë për qytetarët”, tha Reçica
Por shpalljen e gjendjes emergjente për mbeturina nga Komuna e Prishtinës, Reçica nuk po e ka të qartë.
“Ende nuk e kemi të qartë në çfarë forme është shpallë kjo gjendje sepse edhe ne jemi duke i bërë disa matje në terren. Ne e kemi pranu të hënën në mëngjes komplet territorin dhe jemi duke i bërë analizat sa ka pasur vonesa të shërbimit nga operatori privat”, shprehet ai.
Më 3 shkurt, Komuna e Prishtinës ka shpallur gjendje emergjente në lidhje me menaxhimin e mbeturinave në kryeqytet.
Kështu, Komuna e Prishtinës i udhëzoi banorët e kryeqytetit që faturat për grumbullimin e mbeturinave të mos ia paguajnë më kompanisë “Pastrimi” por te njëjtat te realizohen përmes Komunës deri në një vendim të ri”.
Kompania Regjionale e Mbeturinave “Pastrimi”, ka njoftuar se në bazë të vendimit të miratuar nga Kuvendi Komunal faturimi dhe pagesa për shërbimet e menaxhimit të mbeturinave duhet të kryhet drejtpërdrejt në pikat zyrtare të kompanisë.
