Procesi zgjedhor i 9 shkurtit kaloi pa ndonjë incident, për çka Kosova mori edhe notë kaluese nga bashkësia ndërkombëtare.
Megjithatë, pas mbylljes së qendrave të votimit, filluan të shfaqeshin disa parregullsi në ueb-sajtin e Komisionit Qendror të Zgjedhjeve.
E kjo ngriti dyshimet për manipulime me vota në procesin e numërimit të tyre.
Për këtë, tashmë me njoftim zyrtar ka dalë edhe Zyra e Prokurorit të Shtetit ku ka treguar se janë duke e hetuar rastin.
“Zyra e Kryeprokurorit të Shtetit informon opinionin publik se Prokuroria Themelore në Prishtinë, gjatë ditës së djeshme, pasi ka pranuar informacion rreth mos-funksionimit të platformës së KQZ-së, ka kërkuar nga ky institucion marrjen e informatave të nevojshme për të vërtetuar nëse ka elemente të kryerjes së ndonjë vepre penale apo jo.”
Ndërkaq, edhe një komisioner në fshatin Sllatinë të Vitisë, po pretendon se në qendrën ku ka qenë ai, ka pasur keqpërdorime në stilin e “trenit bullgar”.
“Ditën e votimeve shqetësimi im kryesor ka qenë se pas mbylljes së vendvotimit kemi hasur në një parregullsi, atë se nuk janë përputhur numrat e nënshkrimeve në librin e votuesit me numrin e votave në kuti që është tregues i qartë se aty ka qenë e pranishme dukuria e trenit bullgar. Kryesuesi nga radhët e LVV ka propozuar që ai të nënshkruajë në librin e votuesve në mënyrë që të barazojë numrin e votave në kuti me numrin e nënshkrimeve të votuesve”, ka deklaruar komisioneri në zgjedhje, Vegim Ymeri.
Ai thotë se tashmë ka njoftuar edhe Panelin Zgjedhor për Ankesa dhe Parashtresa dhe për këtë është i gatshëm të japë dëshmi para institucioneve të drejtësisë.
“Një parregullsi nuk mund të rregullohet me një parregullsi tjetër, prandaj për këto parregullsi kam raportuar dhe parashtruar ankesë pranë Komisionit për Ankesa dhe Parashtresa PZAP dhe do të presë përgjigje në ditët në vijim. Gjithashtu për këto parregullsi jam i gatshëm të raportojë edhe para Prokurorisë së Shtetit”.
Tëvë1 ka kërkuar pyetje specifike për këtë çështje, mirëpo nuk ka marrë përgjigje as nga Prokuroria dhe as nga Policia e Kosovës.
Treni bullgar është metodë e manipulimit të zgjedhjeve me ç’rast, votuesve që janë të gatshëm të shesin votën e tyre, apo që detyrohen nga frika të votojnë për ndonjërën parti ose kandidat, u jepen fletëvotime të plotësuara para se të hyjnë në vendvotim apo në qendrën votuese.
