Tifozë të shumtë shqiptarë nga të gjitha trojet, u mblodhën të enjten në stadiumin “Air Albania” në Tiranë në mbështetje të kualifikimit të Shqipërisë për Euro 2024.
Disa prej tyre, po mbanin në duar pankartën “Mallkue qoftë, kush s’na do bashkë”.
Megjithëse motoja e tyre nënkuptonte një komb të bashkuar, krerët shtetërorë nuk përcollën të njëjtin mesazh.
Kryeministri i Kosovës, Albin Kurti dhe homologu i tij Edi Rama ishin të pranishëm në këtë ndeshje futbolli, por vendet nuk i zgjodhën përkrah njëri tjetrit.
Deri te kjo ndarje, njohësit e fushës konsiderojnë se ndikuan “problemet personale”, e jo ato politike.
Ish-diplomati, Sylë Ukshini thotë se që nga e kaluara popullata ka treguar solidaritet, derisa elita politike kishte “fërkime”.
“Me këtë fotografi, përçohet një mesazh jo vetëm brenda kombit, por edhe jashtë Kosovës në rajon dhe në botë, që shqiptarët, dy udhëheqësit e dy vendeve nuk komunikojnë. Unë mendoj që ndonjëherë në politikë nuk ka dashni, por duhet të ketë një dakordim dhe një koodinim për intersa më ta larta kombëtare. Dhe për ato interesa mesazhi më i bukur do të ishte sikur dy kryeministrat ta ndiqnin ndeshjen së bashku”, thotë ish-diplomat, Sylë Ukshini.
E njohësi i çështjeve politike, Visar Xani vlerëson se veprime të tilla të liderëve bartin pasoja në procese të rëndësishme politike.
“Mund të kenë edhe ndikime në koordinim të proceseve të rëndësishme shtetërore. Për shkak se shpeshherë marrëdhëniet personale, miqësore, kombëtare janë shfrytëzuar në aspekt pozitiv, por nëse këto nuk shfrytëzohen të cilat i bashkojnë këta dy liderë, atëherë edhe në aspekt diplomatik mund të ketë ngërqe që pastaj mund të kenë efekte negative”, thotë njohësi i çështjeve politike, Visar Xani.
Në anën tjetër, prishtinasit po i arsyetojnë dy liderët shtetërorë për zgjedhjen e tyre. Për ta është e rëndësishme që shqiptarët u shfaqën si një komb.
Ndeshja Shqipëri – Çeki, mori përmasat e një ngjarjeje mbarë-kombëtare, pasi që shihej si një lloj finale që e çonte ekipin shqiptar në kampionatin evropian që zhvillohet vitin e ardhshëm.
