Kombëtarja e Kosovës U21 ka zhvilluar stërvitjen e tretë në kuadër të përgatitjeve për ndeshjen kualifikuese ndaj San Marinos. Atmosfera në ekip është mjaft pozitive dhe lojtarët po përgatiten maksimalisht për sfidën e radhës, ndonëse do të përballen me një kundërshtar modest.
Mesfushori Faton Ymeri u shpreh se San Marino është kundërshtar më i lehtë në krahasim me Spanjën, por theksoi se çdo ndeshje kualifikuese është shumë e rëndësishme. “Na duhet të luajmë fuqishëm për të arritur fitoren. Atmosfera në ekip është shumë e mirë, pasi jemi takuar edhe muajin e kaluar në këtë grumbullim. Kemi analizuar disa herë ndeshjen e fundit ndaj Spanjës dhe kemi ende kohë për t’u përgatitur edhe për San Marinon”, tha Ymeri.
Ndërkaq, Julind Selmonaj theksoi se skuadra është duke punuar fort për të qenë gati për ndeshjen e së martës. “Atmosfera është pozitive dhe jemi duke u përgatitur maksimalisht. Ndeshjet ndaj Spanjës dhe Rumanisë kanë qenë shumë të vështira, por ndaj San Marinos presim rezultat pozitiv dhe do të japim maksimumin,” tha Selmonaj.
Edhe Ikball Jashari u shpreh se stërvitjet po zhvillohen shumë mirë. “San Marino mund të shihet si kundërshtar më i lehtë, por në kualifikime nuk ka ndeshje të lehta. Në çdo takim synimi ynë është fitorja. Në dy ndeshjet e kaluara kemi bërë paraqitje të mira, veçanërisht në Rumani ku arritëm një barazim të vlefshëm. Tani është koha të kthehemi te fitorja në shtëpi”, tha Jashari.
