Kombëtarja U19 e Kosovës në futboll, të martën ka nisur grumbullimin në kuadër të përgatitjeve për dy miqësoret kundër Shqipërisë, që do të zhvillohen në Rogozhinë, në stadiumin “Egnatia Arena”, më 6 dhe 9 qershor.
Grumbullimi i Kosovës U19, do të zgjasë 3 ditë dhe do të zhvillohet në Kampin Nacional në Hajvali, ka njoftuar FFK-ja. Përzgjedhësi i kësaj grupmoshe, Adil Maliqi, në këtë grumbullim ka në dispozicion 23 futbollistë vendorë.
“Ky grumbullim ka një rëndësi të veçantë për përzgjedhësin Maliqi, i cili do të shfrytëzojë këto ditë për të vlerësuar formën aktuale të futbollistëve dhe për të punuar në komponimin e ekipit për turnetë e ardhshme. Trajneri ka si synim të ndërtojë një ekip të fortë dhe konkurrues”, thuhet ndër të tjera në njoftimin e FFK-së.
Ndërkohë, futbollistët e përzgjedhur nga trajneri Maliqi theksuan se këto grumbullime janë një mundësi e shkëlqyer për të përmirësuar lojën e tyre.
