Komandanti i misionit KFOR të udhëhequr nga NATO, Gjenerallejtënant Özkan Ulutaş, të mërkurën ka pritur në takim ambasadorin e Shqipërisë në Kosovë, Petrit Malaj.
Siç bëhet e ditur në njoftim, takimi u fokusua në situatën aktuale të sigurisë në Kosovë dhe riafirmoi angazhimin e KFOR-it për të ruajtur një mjedis të sigurt për të gjithë njerëzit.
Ulutaş ka shprehur mirënjohjen për mbështetjen e vazhdueshme të Shqipërisë ndaj KFOR-it, duke vlerësuar profesionalizmin e trupave shqiptare dhe kontributin e tyre pozitiv në mision.
“KFOR vazhdon të zbatojë mandatin e tij bazuar në Rezolutën 1244 të Këshillit të Sigurimit të OKB-së nga viti 1999, duke kontribuar për një ambient të sigurt për të gjithë komunitetet në Kosovë dhe lirinë e lëvizjes, në çdo kohë dhe në mënyrë të paanshme. KFOR punon ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si përgjegjës të sigurisë”, theksohet në njoftim.
