Komandanti i Forcës së Sigurisë së Kosovës (FSK), Gjenerallejtënant Bashkim Jashari, priti sot me ceremoni ushtarake Komandantin e Forcave Tokësore të Turqisë, Gjeneral Metin Tokel, i cili po qëndron për vizitë zyrtare në Republikën e Kosovës.
Gjatë ceremonisë, Gjeneral Jashari e uroi kolegun e tij turk për emërimin në krye të Forcave Tokësore të Turqisë dhe e falënderoi për vizitën, duke e vlerësuar atë si shenjë të marrëdhënieve të qëndrueshme ndërmjet dy ushtrive.
Në takimin e përbashkët, të dy gjeneralët diskutuan rreth bashkëpunimit të deritashëm mes FSK-së dhe Forcave të Armatosura të Turqisë, duke theksuar veçanërisht rolin e trajnimeve dhe aktiviteteve të përbashkëta që kanë kontribuar në zhvillimin profesional dhe ngritjen e kapaciteteve të FSK-së.
Po ashtu, u shqyrtuan mundësitë për thellimin e këtij bashkëpunimi në fusha të tjera të mbrojtjes.
Gjenerali Tokel rikonfirmoi përkushtimin e Forcave të Armatosura të Turqisë për të vazhduar mbështetjen ndaj FSK-së, duke vlerësuar progresin dhe profesionalizmin e ushtrisë së Kosovës.
Në përfundim të takimit, të dy udhëheqësit ushtarakë u pajtuan për zgjerimin e bashkëpunimit bilateral, me fokus në realizimin e aktiviteteve të përbashkëta që synojnë rritjen e ndërveprueshmërisë dhe forcimin e kapaciteteve mbrojtëse të të dy vendeve./teve1.info./
