Komandanti i Forcës së Sigurisë së Kosovës, gjenerallejtënant Bashkim Jashari ka marrë pjesë në takimin e grupit të kontaktit për Mbrojtjen e Ukrainës, që është zhvilluar sot në Bazën e Forcave Ajrore në Ramstein të Republikës Federale të Gjermanisë, ku mori pjesë edhe presidenti i Ukrainës, Volodymyr Zelensky.
Jashari gjithashtu gjatë forumit ka takuar Gjeneral Christopher Cavoli, komandant i forcave amerikane për Evropë.
“Të dy ritheksuan rëndësinë e bashkëpunimit bilateral dhe multilateral në shërbim të paqes dhe sigurisë euroatlantike. Kosova vazhdon të mbështesë Ukrainën përmes trajnimit të forcave luftarake ukrainase, në fushën e deminimit si dhe ka dhuruar shumë herë pajisje, automjete dhe municion të kalibrave të mëdhenj. Grupi i Kontaktit për Mbrojtjen e Ukrainës është formati i takimeve të ministrave dhe shefave të mbrojtjes të mbi 50 vendeve të botës, që përbëjnë koalicionin e madh të mbështetësve të Ukrainës, që prej fillimit të agresionit rus”, thuhet në njoftimin e FSK-së./teve1.info/
