Pas përfundimit të mandatit njëvjeçar, komandanti i KFOR-it, Ozkan Ulutash, do ta përfundoj mandatin e tij në muajin e ardhshëm. Nga KFOR kanë thënë se komandanti i ri do të jetë gjeneralmajori, Enrico Barduani, duke e kthyer kështu komandën përsëri tek italianët. Njohësit e çështjeve ushtarake, thonë se kjo nuk do të sjell ndryshim të madh në operacionet e KFOR-it në Kosovë, ndërsa fjalë të mëdha kanë për komandantin aktual, turkun Ulutash.
Në tetorin e vitit të kaluar e mori komandën e KFOR-it.
Kështu Ozkan Ulutash u bë komandanti i parë nga Turqia, i forcave paqeruajtëse në Kosovë.
E një vit pas kësaj, Ulutash do ta dorëzojë komandën tek pasardhësi i tij.
Ky pritet të jetë gjeneralmajori i ushtrisë italiane, Enrico Barduani.
Këtë e ka bërë të ditur vet KFOR përmes një komunikate për media.
“Admirali Stuart B. Munsch Komandanti i Komandës së Forcave të Përbashkëta Aleate në Napoli do të kryesojë ngjarjen. Gjeneralmajor i Ushtrisë Turke, Özkan Ulutaş, do t’ia dorëzojë komandën e KFOR-it gjeneralmajorit të ushtrisë italiane, Enrico Barduani”, thuhet nga KFOR-i.
Por, sipas ish-komandantit të FSK-së, Kadri Kastrati, nuk pritet ndryshim sa i përket operacioneve të NATO-s në vend.
“Këtë vit e merr prapë gjenerali italian, gjeneral me një ylli dhe mendoj që do ta menaxhoj siç është më së miri, sepse KFOR-i misionin e ka të pavarur, të paanshëm, të bazuar në rezolutën 1244 dhe nuk pres ndonjë ndryshim spektakular, por një vazhdim i asaj që e kanë pasur deri me tani”, ka thënë ai.
E Kastrati, fjalë të mëdha pati për komandantin aktual të KFOR-it, turkun Özkan Ulutaş.
“Sipas asaj që e kam parë unë, ka qenë një udhëheqje e mirë, e ka menaxhuar jashtëzakonisht mirë mandatin e vet, edhe pse situata e sigurisë ka qenë jo e mirë, pasi ne e patëm vitin e kaluar një sulm terrorist në Banjska në pjesën veriore të vendit”, ka vlerësuar Kastrati.
Ndryshe, përmes një komunikate për media të lëshuar nga KFOR, të hënën u bë e ditur se Rreth 200 pjesëtarë të Forcës Aleate të Reagimit të NATO-s do të dislokohen në Ballkanin Perëndimor nga 30 shtatori deri më 16 tetor për të kryer.
Një kontigjent ushtarak i Ekipit Operacional të Ndërlidhjes dhe Zbulimit (OLRT) të FSHSH-së prej rreth 50 vetësh do të jetë në Kosovë dhe në Maqedoninë e Veriut do të krijohet një nyje komanduese me rreth 150 personel.
