Kolektivi për Mendim dhe Veprim Feminist, ka organizuar një aksion simbolik, pas plagosjes së një gruaje nga burri i saj, të mërkurën në Fushë-Kosovë.
Aksioni u zhvillua pranë stacionit policor në Prishtinë dhe më pas pranë Prokurorisë së Shtetit, në ndërtesat e të cilëve kanë shkruar “Po i vrisni gratë”.
Nga aty deklaruan, se janë mbledhur në shenjë revolte për neglizhencën ndaj jetës së grave, si dhe normalizimit të dhunës, pasi që vetëm brenda një jave, një grua u vra e një tjetër u plagos.
“Jemi mbledhë sot këtu për ta shprehë revoltën tonë me neglizhencën e jetëve të grave dhe normalizimin e dhunës së gjinizuar nga institucionet e shoqëria. Veç brenda një javë, një burrë e vrau gruan në Graçanicë dhe një tjetër tentoi ta vriste gruan ne Fushe Kosovë. Ky i fundit ishte arrestuar pak ditë më parë për dhunë ne familje, për t’u liruar pas 48 orëve ne procedure te rregullt”, thuhet në reagim.
Kolektivi për Mendim dhe Veprim Feminist, konsideron se fajtore për këto raste janë edhe institucionet, të cilat sipas tyre po bëjnë lojë duke hedhur fajin te njëra tjetra e duke i amnistuar të akuzuarit për dhunë.
“Përgjatë gjithë kësaj kohe jemi njoftuar për raste te shumta përdhunimesh e dhune ne familje. E ajo se çka pamë nga institucionet ishte një loje e vazhdueshme për ta hedhë fajin te njëra-tjetra. E gjithë kjo teksa qeveria vazhdon të amnistoj të akuzuar për dhunë në familje teksa zotohet ta luftojë dhunën”, shtohet tutje në reagim.
Sipas kësaj organizate, duke i bërë bashkëfajtore institucionet e Kosovës për vrasjen e grave, iu kujtojnë atyre se për gjininë femërore çdo ditë është luftë nga plumbat e sëpatat, në të cilën luftë shteti po vazhdon ta mirëmbajë patriarkalizmin./teve1.info/
