Autore: Jona Kelmendi
Hyrja e lagjes Kodrina në Prishtinë është kthyer në një sfidë.
Kjo meqë banorët e lagjes thonë se një ndërhyrje nga Kompania Rajonale e Ujësjellësit, e la rrugën në këtë gjendje.
Ndërsa, ajo u vështirësua pas reshjeve atmosferike të ditëve të fundit.
“Qe dola sot ky uji këtu, rruga gjithë prishet qaty, gjithmonë që dy vjet gati që jom këtu. Po duhet me ia lëshu rrugën kerreve, ka shumë ujë pot lagin, ka të kujdesshëm ka edhe shumë të pa kujdesshëm”, tha një banore e kësaj lagje.
Kjo banore nuk ishte e vetmja që ankesat e saj i ndau me Tëvë1.
“Kjo rrugë është që sa kohë, sa e kanë shtru prap e kan prishë se tenderat janë në pyetje krejt. Shumë vështirësi po ka edhe me bo mu ngri ktu bohet katastrofë edhe gropat janë katastrofë, kjo rrugë se di çfarë punëkryersi po i kryen këto punë”, shprehet Naser Gashi, banor i lagjes.
“Po për neve është vështirë shumë, për fëmijë është vështirë shumë, fëmija shkojnë në shkollë, qetash s’paska sen çka bohet këtu, kush nuk merr masa hiç nuk e di”, shprehet një tjetër banor.
E moti i ditëve të fundit, bën që disa banorë ta pësojnë edhe më keq.
“Siç pe shihni koha është minus, plus uji po rrjedh plus rruga shumë e ngusht me tejkalu, unë në mengjes veç se jom rrzu njëherë, shumë është e vështirë”, shprehet Arta Stublla- banore.
E lehtësim për banorët duket se nuk do të ketë pa përmirësimin e kushteve atmosferike.
Të paktën kështu i kanë thënë të dielën televizionit nga Kompania Rajonale e Ujësësjellit në Prishtinë.
“Kemi kontakt dhe marrëveshje me NPB për asfaltim te gropave, po për shkak te kushteve atmosferike nuk janë aktualisht duke punuar. Kjo çështje do te rregullohet me fillimin e punëve nga NPB”, kanë njoftuar nga kjo kompani.
Tëvë1 ka kontaktuar edhe me komunën e Prishtinës për këtë problem të adresuar nga banorët.
Nga komuna kanë thënë se kjo është në përgjegjësi të Ujësjellësit dhe nëse gjendja nuk rregullohet atëherë do të shqiptojnë gjoba.
