Koalicioni për Familjen të mërkurën zhvilloi një vizitë me përfaqësuesit e Odës Ekonomike të Kosovës.
Atje, Selim Pacolli diskutoi nxitjen e bashkëpunimit ndërmjet sektorit privat dhe politikave publike, krijimin e vendeve të reja të punës, si dhe forcimin e ekonomisë kombëtare për një të ardhme të qëndrueshme.
Në një njoftim në Facebook, kjo parti tha se bashkëpunimi me Odën Ekonomike shënon një hap të rëndësishëm drejt një të ardhmeje më të mirë për Kosovës.
“Oda Ekonomike vlerësohet si një partner kyç në përballimin e sfidave ekonomike dhe avancimin e politikave në mbështetje të familjeve .Ky bashkëpunim shënon një hap të rëndësishëm drejt një të ardhmeje më të mirë për Kosovën”, thuhet nga Koalicioni për Familjen.
Me të përfunduar takimin në Odën Ekonomike, kandidatët e Koalicionit për Familjen vazhduan për tek Shoqata e Pensionistëve.
Aty, kjo parti prezantoi angazhimet e tyre për përmirësimin e kushteve të pensionistëve.
“Gjatë takimit, u theksua roli i pazëvendësueshëm i pensionistëve në ndërtimin e shoqërisë sonë, ku u diskutuan sfidat me të cilat përballen dhe u prezantuan angazhimet konkrete për përmirësimin e kushteve të tyre. Koalicioni për Familjen shpreh mirënjohjen më të thellë për kontributin e çmuar të tyre dhe shpreh përkushtimin për të adresuar me seriozitet çdo çështje që ndikon në mirëqenien dhe dinjitetin e tyre.Së bashku, për një Kosovë që respekton dhe mbështet çdo brez”.
Fushata zgjedhore e partive politike në Kosovë nisi më 11 janar, ndërsa zgjedhjet do të mbahen më 9 shkurt.
