Për tri ditë rresht në Ohër të Maqedonisë së Veriut është mbajtur turneu i madh regjional i Ballkanit për grupmoshat e reja “West Balkan Football Children’s Cup”.
Në këtë turne, u paraqit edhe Shkolla e futbollit “Zidane” me trajnerin Muhamet Dragusha, që përfaqësoi Prishtinën me gjeneratat U9 dhe U11.
Të dy grupmoshat e SHF “Zidane”, në fund arritën të triumfojnë duke ngritur trofetë pasi mposhtën ekipet me të cilat u përballën.
Krahas fitoreve në fushë, ekipi U9 dhe U11 i SHF “Zidane” shënoi fitore edhe jashtë fushe pasi skuadrat pjesëmarrëse nga Serbia refuzuan të përballeshin me vogëlushët kosovar.
Cërvena Zvezda, Partizani, Zemuni e Zvezdica, klube nga Beogradi refuzuan të dalin në fushë për të luajtur kundër moshatarëve të tyre nga “Zidane”, gjë që rezultoi edhe me eliminim të tyre nga turneu i Ohrit.
Ndikimi i politikës serbe edhe në sport, bëri që klubet të mos pranojnë të luajnë me ekipet e SHF “Zidane” duke u ndëshkuar me largim nga turneu për këtë veprim të pahijshëm.
Megjithatë, vendosmëria e ekipeve U9 dhe U11 të SHF “ZIdane” për të përfaqësuar futbollin kosovar në mënyrën më të mirë të mundshme, i motivoi edhe më shumë për të vazhduar deri në fund për t’u kurorëzuar kampionë.
Ky është suksesi i radhës për njomakët e kësaj shkolle të futbollit, të cilët triumfuan edhe në turneun e mbajtur në Basel të Zvicrës, pastaj Shkodër dhe Durrës.
