Gjermani Jurgen Klopp nuk e përjashton një rikthim në zejen e trajnerit.
Klopp nuk ka plan për të punuar si trajner për momentin, megjithëse e la derën e hapur për një rikthim.
“A dua të jem përsëri trajner? Tani për tani do të thosha jo, por nuk mund të them kurrë. Nuk pres të ndryshoj mendje, por nuk e di”, ka thënë Klopp në një intervistë për AFP.
Edhe mediumet tjera evropiane kanë shpërndarë deklaratat e Kloppit, i cili është një nga emrat që është përmendur më së shumti si trajner i mundshëm i ardhshëm i Real Madridit.
“Si person jam plotësisht i kënaqur me situatën time. Nuk do të doja të isha askund tjetër”, është shprehur Klopp. “Nuk zgjohem dhe entuziazmohem nëse Real Madridi po tregon interesim”.
Ai ka kritikuar Realin për shkarkimin e Xabi Alonsos.
“Do të rekomandoja që nëse shkarkoni një trajner, më mirë të keni një ide se me kë dëshironi ta zëvendësoni atë. Dhe duhet të jetë realiste. Nëse mendojnë se mund ta marrin Pep Guardiolan, do të thosha se nuk ka shumë gjasa”.
Alonso u zëvendësua nga trajneri i përkohshëm Alvaro Arbeloa pas humbjes 3:2 nga Barcelona në finale të Superkupës së Spanjës.
Klopp udhëhoqi së fundmi Liverpoolin nga viti 2015 deri në vitin 2024.
Kloppi nga janari i vitit të kaluar është udhëheqës i Red Bullit për futboll.
