Përveç ekipeve të kërkim-shpëtimit nga Forca e Sigurisë e Kosovës, kameramani nga Prishtina Sylejman Kllokoqi është duke qëndruar në Gazientep të Turqisë dhe duke parë nga afër situatën e cila tash e një javë është krijuar nga tërmeti shkatërrimtar.
Ai thotë se nuk ka ndonjë ndryshim të madh, madje këto tri ditët e fundit ai informon se hajnat kanë filluar të vjedhin shumë, për shkak se qyteti është zbrazur.
“Ky qytet ku jam unë i ka mbi 2 milionë banorë dhe ju e shihni se në ato ndërtesa nuk ka ndriçim dhe se 90 për qind të banorëve janë larguar. Andej puna për rrënojat ka vazhduar dhe po vazhdon për 24 orë në ditë, ku çdo 8 orë stafi ndërrohen, por gjasat kanë filluar të pakësohen se do të mundë të gjejnë ndonjë të gjallë”, ka deklaruar ai në emisionin “Ditari” në Tëvë1.
Ai tregon se është shumë vështirë të punohet pasi që rrënojat kanë filluar të jenë ka fundi. Në lokacionin ku ai po qëndron ka bërë të ditur se vetëm gjatë ditës së djeshme janë nxjerrë gjashtë trupa, ndërsa sot po e pastrojnë sepse nuk ka më trupa në atë lokacion.
“Në këto 6 qytete, janë 500 lokacione të cilat janë shumë të mëdha, ku secili prej tyre e ka madhësinë e 2 milionë d.m.th. sa krejt shqiptarët e Kosovës”, thotë ai tutje.
Kameramani ka treguar se: “ky vend është ndërtuar në 20 vitet e fundit dhe ndërtesat në përgjithësi janë 17 kate dhe janë shumë të larta. Nuk e di kush këtu i ka fajet”.
Ai thotë se: “momentalisht ku jam tani afër një rrënoje, me drita janë duke punuar dhe pa pushuar”. Tutje ai tregon se po sheh mobilizim të madh të njerëzve.
Tërmeti prej 7.8 ballësh që u pasua nga disa tërmete të tjera të fuqishme në Turqi dhe Siri, është fatkeqësia e shtatë më vdekjeprurëse e këtij shekulli, ku deri më tani raportohet se numri i viktimave ka arritur të jetë mbi 37 mijë.
