Tash e disa javë detyrohen të përdorin vetëm shkallët.
Kjo pasi në këtë klinikë kanë filluar punimet për ashensorin e ri.
Por mosfunksionimi i ashensorit ka bërë që pacientët e shtrirë në këtë klinikë të hasin në vështirësi.
Madje familjarët detyrohen të kërkojnë ndihmë nga të tjerët.
E me këtë problem po përballët edhe Nexhmije Lushi, e cila e ka babin të shtrirë në këtë klinikë.
“Të hënën ka pas me i bë disa incizime të thella për shkak që ka pasur gjakderdhje në tru është dashur me ja bo rezonancën. E kemi pas shumë të vështirë sepse është dashur mi thirrë krejt njerëzit që janë këtu për familjarët e vet me na ndihmu me zbrit poshtë me krevatin e tij. Ka pasur gjakderdhje në tru dhe ka pasur tani shumë probleme edhe i ka ardh edhe me vjell për shkak që e kemi lëvizur për shkak shkallëve”, ka thënë Nexhmije Lushi-qytetare.
Lidhur me këtë çështje, nga Klinika Neurologjike thonë se ashensori në fjalë është i vjetër dhe është vendosur që të zëvendësohet me një të ri.
Sipas tyre kjo punë do të zgjasë deri në një muaj.
“Për këtë situatë ne kemi marrë masa dhe jemi duke u munduar maksimalisht që pacientët më të rëndë me vështirësi në lëvizje t’i mbajmë në katin e parë (përdhes) kurse ata më të lëvizshëm t’i bartim përmes shkallëve në katin e dytë. Mund të ketë ndonjë përjashtim për shkak se edhe kapacitetet e katit të parë janë të kufizuara (14 shtretër)”, thonë nga Klinika Neurologjike.
Ndër të tjera, nga klinika në fjalë u kërkua mirëkuptim nga pacientët dhe familjarët, sepse sipas tyre, vendosja e një ashensori të ri do të ndihmojë pacientët dhe jo vetëm.
