Prokuroria Speciale e Kosovës ka njoftuar se ka ngritur aktakuzë ndaj dy personave, përfshirë Faton Klinakun dhe një person tjetër me inicialet N.S., për veprën penale “Kanosja” ndaj kryeministrit në detyrë, Albin Kurti.
Sipas komunikatës zyrtare, aktakuza është dorëzuar në Gjykatën Themelore në Prishtinë dhe lidhet me postime të bëra në rrjetin social “Facebook”, të cilat përmbanin kërcënime ndaj kreut të qeverisë.
“Me datë 29.08.2023, i pandehuri F.K., me qëllim frikësimi dhe detyrimi ndaj zyrtarit publik A.K., në cilësinë e tij si kryeministër i Republikës së Kosovës, ka postuar përmbajtje kërcënuese në profilin e tij personal në ‘Facebook’, duke kërkuar që ai të ndërmarrë ose të mos ndërmarrë veprime të caktuara në ushtrimin e detyrës zyrtare”, thuhet në njoftimin e Prokurorisë.
Pas raportimeve mediatike, Faton Klinaku nga Organizata e Veteranëve të Luftës së UÇK-së (OVL-UÇK), ka reaguar përmes një postimi në Facebook, duke shprehur habinë e tij për ngritjen e aktakuzës dhe duke deklaruar se nuk është njoftuar zyrtarisht për të.
“Edhe pse unë po informohem nga mediat dhe për këtë nuk di asgjë e as avokati im, mezi nuk po pres të ballafaqohem me A.K., të cilin edhe do ta ftoj si dëshmitar në gjykatë”, ka shkruar Klinaku.
Ndaj të pandehurve rëndon vepra penale e kanosjes, ndërsa procesi gjyqësor pritet të zhvillohet në Gjykatën Themelore të Prishtinës.
