E në Luginë të Preshevës, shqiptarët po vazhdojnë të diskriminohen në konkurse për punë të komunës së Preshevës, Bujanocit dhe Medvegjës. Të hënën, Këshilli Kombëtar Shqiptar ka bërë një aksion kundër këtyre vendimeve që të vijnë serbë nga komunat e tjera më të largëta të punojnë në institucionet ku ka shumicë shqiptare. Kryetari i KKSH-së, Nevzad Lutfiu thotë se shqiptarët po diskriminohen në secilin konkurs që po hapet.
Në këtë gjykatë të Komunës së Bujanocit, do të sistemohet edhe një gjykatëse e re serbe.
E për të ardhur në punë nga komuna e Surdulicës, e njëjta do të bëjë rreth 105 km rrugë.
Kryetari i Këshillit Kombëtar Shqiptarë thotë se për këtë pozitë kishin kandiduar edhe kuadro shqiptarë nga komuna e Bujanocit por të njëjtit u refuzuan.
Andaj përfaqësuesit e Këshillit Kombëtar Shqiptarë bënë një aksion para kësaj gjykate për të kundërshtuar këtë vendim.
Me problemin e njëjtë po ballafaqohen edhe qytetarët e Luginës së Preshevës.
Lutfiu tregon që në gjykatën për kundërvajtje në këtë komunë, do të sistemohet një tjetër serb nga komuna e Vrajës.
Ky është aksioni i tretë nga Këshilli Kombëtar Shqiptar për punësimet serbe në Luginë të Preshevës.
Sipas tij, me këtë po shkelen marrëveshjet bazike nga shteti serb.
Sipas këtij këshilli, problem të njëjtë me punësim vetëm të serbëve ka edhe në Shtëpinë e Shëndetit dhe Stacionin e Policisë në këto komuna.
