Kryetari i Partisë Rome të Bashkuar (PRYK), Albert Kinolli pas takimit të së enjtes me kryeministrin në detyrë, Albin Kurti ka thënë se do të japin maksimumin e tyre për formimin e qeverisë së re.
Kinolli ka treguar se në takim kanë kërkuar që në kuvend të jenë dhe të trajtohen të barabartë si të gjitha subjektet tjera politike edhe pse përfaqësohen vetëm nga një deputet.
“Ne si subjekt politik rom tradicionalisht jemi munduar që të jemi sa më konstruktiv dhe kreativ dhe të japim kontributin tonë për formimin e qeverisë së re dhe institucioneve të Kosovës. Ne nuk kemi vija të kuqe për asnjë subjekt politik por duke respektuar rezultatin zgjedhor dhe duke pasur parasysh që LVV është fituese e zgjedhjeve sot kemi pasur takim me kryeministrin kemi pasur një takim shumë të mirë konstruktiv dhe të hapur kështu që ne kemi parashtruar kërkesat tona dhe njëra prej tyre ka qenë që pasi që ne jemi të përfaqësuar në kuvend me një deputet që të jemi të barabartë dhe të trajtohemi të barabartë si të gjitha subjektet tjera politike të cilat janë në një vijë me ne. Ne po presim 15 prillin besojmë që kryeministri Kurti do t’i ketë numrat e nevojshëm dhe në këtë kontekst edhe ne do të japim maksimumin tonë për formimin e qeverisë së re”, ka deklaruar ai pas takimit me Kurtin ku është diskutuar për formimin e qeverisë së re.
