Ushtria kineze njoftoi të martën stërvitje në shkallë të gjerë në ujërat dhe hapësirën ajrore përreth Tajvanit që përfshin një grup luftarak të aeroplanmbajtësve, pasi paralajmëroi përsëri demokracinë e vetëqeverisur ishullore kundër kërkimit të pavarësisë formale.
Stërvitjet e përbashkëta përfshijnë forcat detare, tokësore ajrore dhe raketash dhe kanë për qëllim të jenë një “paralajmërim i ashpër dhe kontroll i fuqishëm kundër pavarësisë së Tajvanit”, sipas Shi Yi, një zëdhënës i Komandës së Teatrit Lindor të Ushtrisë Çlirimtare Popullore, raporton AP.
Kina e konsideron Tajvanin një pjesë të territorit të saj, që do të vihet nën kontrollin e saj me forcë nëse është e nevojshme, ndërsa shumica e tajvanezëve favorizojnë pavarësinë e tyre de-fakto dhe statusin demokratik.
Çdo konflikt i mundshëm mund të përfshijë edhe ShBA-në, e cila mban një sërë aleancash në rajon dhe ligjërisht është e detyruar t’i trajtojë kërcënimet ndaj Tajvanit si një “shqetësim të madh”.
Zyra presidenciale e Tajvanit postoi në X se “provokimet flagrante ushtarake të Kinës jo vetëm që kërcënojnë paqen në Ngushticën e Tajvanit , por gjithashtu minojnë sigurinë në të gjithë rajonin, siç dëshmohet nga stërvitjet pranë Australisë, Zelandës së Re, Japonisë, Koresë, Filipineve dhe SCS. Ne dënojmë fuqishëm sjelljen përshkallëzuese të Kinës”.
SCS i referohet Detit të Kinës Jugore, rrugës ujore strategjike që Kina pretendon pothuajse në tërësinë e saj.
