Zyrtarë nga Ukraina dhe Shtetet e Bashkuara do të takohen këtë javë në Arabinë Saudite për të negociuar mundësinë e përfundimit të luftës me Rusinë.
Zelensky ka mbërrirë të hënën në Arabinë Saudite për t’u takuar me Princin e Kurorës, Mohammed bin Salman, dhe do të qëndrojë aty për takimin e rëndësishëm të martën me përfaqësuesit amerikanë.
Kiev do të propozojë një armëpushim ajror dhe detar me Rusinë gjatë bisedimeve me zyrtarët amerikanë në Arabinë Saudite këtë javë, tha një zyrtar ukrainas për AFP-në.
“Ne kemi një propozim për një armëpushim në qiell dhe armëpushim në det”, tha zyrtari, duke folur në kushte anonimiteti.
Ekipi i Ukrainës për takimin e së martës pritet të përfshijë Andriy Yermak, kreun e zyrës së Zelenskyy; Andrii Sybiha, ministër i Punëve të Jashtme; Rustem Umerov, ministër i mbrojtjes; dhe Pavlo Palisa, një kolonel në zyrën e Zelenskyy.
Nga pala amerikane në takimin e së martës do të marrë pjesë edhe Sekretari i Shtetit Marco Rubio. Ai tashmë ka fluturuar për në Arabinë Saudite, ku do të takohet edhe me princin e kurorës. Rubio pritet t’i bashkohet i dërguari i posaçëm i Trump për Lindjen e Mesme Steve Witkoff dhe Këshilltari i Sigurisë Kombëtare Mike Waltz.
Ministria e Punëve të Jashtme në Arabinë Saudite tha në një deklaratë të premten se takimet do të zhvillohen në Jeddah, një qytet port në Detin e Kuq, raporton Al Jazeera.
Muajin e kaluar, përfaqësues nga Uashingtoni dhe Moska patën bisedime në Riad, me mungesën e Ukrainës dhe vendeve evropiane.
