Deputetja e zgjedhur e Lidhjes Demokratike të Kosovës, Doarsa Kica-Xhelili tha se kryesuesi i seancës, Avni Dehari, nuk ka të drejtë të thërras për konsultim përfaqësuesit e subjekteve politike.
“Mund të them që kjo sapo bëri kryesuesi i seancës konstituive është rasti i paprecedent dhe nuk përkon me asnjë procedurë të rregullores të Kuvendit të Kosovës. Në këtë fazë kryesuesi i Kuvendit nuk ka të drejtë ftoj akterët për asnjë konsultim politik të asnjë natyre sepse ne po flasim për një çështje krejtësisht procedurale. Ajo që mund të bëjë ai në këtë fazë, është ose të thërras edhe një herë të formohet komisioni dhe partitë politike apo ta ri qes në rivotim raportin e djeshëm por jo të ftojë konsultim”, deklaroi ajo.
Kryesuesi i seancës konstituive, Avni Dehari ftoi për konsultim përfaqësuesit e subjekteve politike, për mënyrën se si të procedohet tutje.
Sipas tij, konsultimet janë të nevojshme në mënyrë që “ të mos bëjmë shkelje ligjore dhe kushtetuese”.
Ai tha se presidentja Vjosa Osmani nuk ofroi zgjidhje përfundimtare. Dehari tha se Osmani kërkoi që partitë të gjejnë vullnet për ta zhbllokuar situatën.
Deputetët e zgjedhur u mblodhën sot më 17 prill në një tentim të dytë për konstituimin e Kuvendit.
Kryesuesi i seancës, Avni Dehari i dërgoi letër presidentes më 16 prill përmes së cilës i kërkoi sugjerime për veprime tutje.
Presidentja kujtoi rregulloren e Kuvendit dhe tha se seanca duhet të vazhdojë brenda 48 orësh.
Konstituimi i Kuvendit do t’i hapte rrugë votimit të kryeparlamentarit e më pas qeverisë së re.
Deri më tash, LVV-ja si parti fituese nuk e ka bërë të ditur emrin që do ta propozojë për kryetar të Kuvendit dhe as nëse i ka numrat për ta votuar atë.
