Kampioni i Kosovës në hendboll, KHF Istogu, nuk ka arritur të sigurojë palestër në vendin tonë për zhvillimin e ndeshjes së raundit të tretë të Kupës Evropiane (EHF European Cup).
Dhe për këtë arsye të dy ndeshjet ndaj skuadrës portugeze, Madeira Andebol SAD, do të zhvillohen në Madeira të Portugalisë.
Sipas shortit, ndeshja e kthimit është dashur të luhet në shtëpinë tonë. Por kjo doli të jetë e pamundur. Palestra e qytetit në Istog ka disa vjet që është duke renovuar. Palestra “Dresha” në Banjë, ndaj pronarëve të së cilës jemi shumë falënderues, nuk plotëson kriteret e kërkuara për këtë raund garash. Ndërkohë nuk kemi mundur ta organizojmë ndeshjen as në Pejë, për shkak se në këtë komunë ka balotazh për zgjedhjet lokale dhe palestra do të jetë e zënë për numërimin e votave.
Marrë për bazë këtë situatë, jemi detyruar që të dy ndeshjet t’i luajmë në Portugali. Kjo natyrisht është goditje në aspektin sportiv, ndonëse synimi ynë mbetet që ta kalojmë edhe këtë kundërshtar.
Si skuadra e vetme kosovare në këtë raund garash, po e vazhdojmë punën me përkushtim maksimal për prezantim të denjë dhe për të avancuar në mesin e 16 skuadrave më të mira të kësaj gare.
Klubi ynë ka kohë që përballet me sfida gati të papërballueshme në mungesë të palestrës. Shpresojmë shumë që pas përfundimit të zgjedhjeve lokale, prioritet i pushtetit qendror do të jetë përfundimi i rinovimit të tejzgjatur të palestrës së qytetit në Istog.
Falë sukseseve që kishim e kemi si skuadër, kjo palestër është bërë e njohur në shumë vende. Por për fat të keq ajo për shumë vjet nuk po shfrytëzohet nga sportistët.
