Misioni i NATO-s në Kosovë, KFOR, ka bërë të ditur se ishte i gatshëm të ndërhynte nëse kërkohej pas sulmit terrorist që ndodhi në Banjskë të Zveçanit më 24 shtator, ku mbeti i vdekur një zyrtar policor, Afrim Bunjaku.
Përmes një komunikate, KFOR-i ka thënë se kanë vepruar ngushtë me institucionet e Kosovës dhe EULEX-in.
“Siç është theksuar edhe në deklaratën e KFOR-it të lëshuar më 24 shtator 2023, pas sulmit të kryer kundër Policisë së Kosovës në Banjskë, Policia e Kosovës ka ndërhyrë në përputhje me prerogativat e saj të zbatimit të ligjit, si reaguese e parë. Trupat e KFOR-it ishin të pranishëm në zonë. Ata vëzhguan nga afër situatën dhe ishin të gatshëm të përgjigjeshin, nëse kërkohej. Gjatë gjithë kohës, Policia e Kosovës, EULEX-i dhe KFOR-i kanë vepruar në koordinim të ngushtë, respektivisht si reagues i parë, i dytë dhe i tretë”, thuhet në njoftimin e KFOR-it.
Njëherit, në komunikatë thuhet se komandanti i KFOR-it mbetet në kontakt të rregullt me të gjitha palët e interesuara, përfshirë këtu EULEX-in, përfaqësuesit e institucioneve në Kosovë si dhe shefin e Shtabit të Forcave të Armatosura të Serbisë.
“Përmes KFOR-it, NATO gjithmonë do të ndërmarrë të gjitha veprimet e nevojshme për të ruajtur një mjedis të sigurt dhe lirinë e lëvizjes për të gjitha komunitetet në Kosovë, në mënyrë të paanshme dhe në përputhje me mandatin tonë bazuar në Rezolutën 1244 të Këshillit të Sigurimit të Kombeve të Bashkuara të vitit 1999”, vijon njoftimi i KFOR-it.
KFOR-i edhe një herë ka bërë thirrje që dialogu është adresa ku mund të zgjidhen çështjet e pazgjidhura.
“KFOR-i gjithashtu do të vazhdojë të ofrojë kornizën e nevojshme të sigurisë që dialogu i ndërmjetësuar nga BE-ja ndërmjet Beogradit dhe Prishtinës të ecë përpara. Dialogu i ndërmjetësuar nga BE-ja ndërmjet Beogradit dhe Prishtinës është mënyra e vetme për të zgjidhur çështjet e pazgjidhura dhe për të arritur një zgjidhje të qëndrueshme që respekton të drejtat e të gjitha komuniteteve”, thuhet në komunikatën e KFOR-it./teve1.info/.