Nënkoloneli britanik në pension, Ade Clewlow, ka kritikuar ashpër misionin e KFOR-it në Kosovë gjatë një interviste për televizionin Tëvë1, duke vënë në dyshim gatishmërinë e tij për të garantuar sigurinë në vend.
Sipas Clewlow, KFOR-i ka kapacitete të mjaftueshme ushtarake për ta mbrojtur Kosovën, por, sipas tij, i mungon vullneti politik për të vepruar në mënyrë më vendimtare.
“KFOR-i ka kapacitetet e nevojshme për ta mbrojtur Kosovën, por problemi kryesor është mungesa e vullnetit politik,” ka deklaruar Clewlow për Tëvë1.
Pas këtyre deklaratave, KFOR-i ka reaguar përmes një përgjigjeje zyrtare për Tëvë1, duke theksuar se nuk komenton opinionet individuale, por ka riafirmuar përkushtimin e tij ndaj mandatit për sigurinë në Kosovë.
“Sipas politikës dhe praktikës së vendosur, ne nuk komentojmë mbi opinionet individuale,” thuhet në reagimin e KFOR-it.
Misioni i NATO-s vlerëson se situata e sigurisë në Kosovë është përgjithësisht e qetë, por mbetet e brishtë për shkak të çështjeve të pazgjidhura dhe përdorimit të herëpashershëm të retorikës nxitëse.
“KFOR-i është i pajisur mirë dhe i pozicionuar në mënyrë adekuate për t’u përballur me çdo zhvillim që mund të ndikojë në sigurinë në Kosovë ose stabilitetin rajonal,” thuhet më tej në përgjigje.
KFOR-i thekson se vepron nën mandatin afatgjatë të Rezolutës 1244 të Këshillit të Sigurimit të OKB-së, duke kontribuar çdo ditë në ruajtjen e një mjedisi të sigurt dhe në garantimin e lirisë së lëvizjes për të gjithë qytetarët, në bashkëpunim të ngushtë me Policinë e Kosovës dhe EULEX-in.
Në reagim përmendet edhe bashkëpunimi i vazhdueshëm me Forcat e Armatosura të Serbisë, përfshirë komunikimet e rregullta ndërmjet komandantit të KFOR-it, gjeneral major Özkan Ulutaş, dhe shefit të Shtabit të Ushtrisë së Serbisë, gjeneral Milan Mojsilović.
Pas rritjes së dhunës në vitin 2023, KFOR-i njofton se është përforcuar me 1.000 trupa shtesë, si dhe ka shtuar patrullimet përgjatë Vijës Kufitare Administrative (VKA), përfshirë patrulla të përbashkëta me Policinë e Kosovës në veri.
KFOR-i ka përmendur edhe reagimin e shpejtë pas sulmit ndaj kanalit të ujit në Zubin Potok më 29 nëntor 2024, duke ofruar siguri, mbështetje logjistike, asgjësim të mjeteve shpërthyese dhe mbrojtje të infrastrukturës kritike.
“KFOR-i nuk ka mandat për zbatimin e ligjit. Është e rëndësishme që të gjitha faktet lidhur me sulmin të sqarohen dhe përgjegjësit të sillen para drejtësisë,” thuhet në deklaratë.
Në fund, misioni i NATO-s thekson se zgjidhja afatgjatë e situatës në Kosovë është politike, duke nënvizuar rëndësinë e dialogut të lehtësuar nga Bashkimi Evropian ndërmjet Prishtinës dhe Beogradit.
“KFOR-i do të vazhdojë të përmbushë mandatin e tij në mënyrë të paanshme dhe profesionale, duke ofruar hapësirën e nevojshme që dialogu politik të ecë përpara,” përfundon reagimi.
