Qeveria në detyrë e Kosovës ka vendosur gurthemelin për ndërtimin e dy urave të reja mbi lumin Ibër, që ndan Mitrovicën e Jugut me atë të Veriut, njërën për këmbësorë dhe tjetrën për automjete.
Misioni paqeruajtës i NATO-s në Kosovë, KFOR, ka deklaruar se çështjet e ngritura së fundmi lidhur me këtë projekt janë jashtë mandatit të tij.
Në një përgjigje zyrtare për Tëvë1, KFOR thekson se vazhdon të mbajë prani të përhershme në urën mbi lumin Ibër në Mitrovicë, si dhe patrullime të rregullta në zonën përreth për të garantuar siguri dhe qetësi për të gjithë qytetarët.
“KFOR gjithashtu ka një prani të dukshme dhe fleksibile në veri të Mitrovicës, si dhe në të gjithë Kosovën, dhe është i gatshëm të reagojë ndaj çdo zhvillimi të rëndësishëm të sigurisë, në dobi të të gjitha komuniteteve në Kosovë”, thuhet në përgjigje.
Misioni nënvizon se vazhdon të zbatojë mandatin e tij sipas Rezolutës 1244 të OKB-së, duke vepruar në mënyrë të paanshme dhe në bashkëpunim të ngushtë me Policinë e Kosovës dhe EULEX-in.
Ndërkaq, Qeveria në detyrë tha se projekti, që kap vlerën prej rreth 3 milionë eurosh, synon ta lehtësojë qarkullimin dhe të nxisë bashkëpunim mes qytetarëve në të dy anët e lumit./teve1.info/
