Pas titullit të kampionit, futbollistet e skuadrës së Mitrovicës po synojnë edhe Kupën e Kosovës për ta përmbyllur edicionin me dy trofe të fituara.
Në finalen e Kupës së Kosovës, Mitrovica do të përballet me skuadrën Kosova VR. Kjo ndeshje luhet të enjten prej orës 15:00 në Kampin Nacional të FFK-së, në Hajvali.
Mitrovica vlerësohet favorite përballë Kosovës VR, duke marrë parasysh formën e treguar këtë edicion në futbollin e femrave.
Në 21 ndeshje kampionale, Mitrovica ka regjistruar 20 fitore dhe 1 barazim duke e mbyllur edicionin me titullin e kampionit dhe pjesëmarrjen në Ligën e Kampionëve edicionin e ri.
KFF Mitrovica po e kërkon suksesin e shtatë rresht në Kupën e Kosovës, ndërsa ka edhe pesë tituj kampioni të fituar.
