KF Llapi ka prezantuar të premten edhe zyrtarisht portierin shtatlartë, Marijan Coric, i cili ka përfunduar me sukses të gjitha çështjet procedurale dhe tashmë është bashkuar me ekipin në stërvitje.
“Ky transferim i rëndësishëm sjell një përforcim të madh në portën e skuadrës, ndërsa Çoriq do të jetë një shtyllë e fortë në mbrojtjen e ngjyrave bardh e kaltër”, ka shkruar në fazen zyrtare klubi llapjan.
Drejtori Sportiv, Mentor Zhdrella, i ka uruar mirëseardhje lojtarit të ri duke shprehur besimin e plotë në cilësitë e tij. “Çoriq është një portier me eksperiencë dhe cilësi të larta. Jemi të lumtur që e kemi sërish në mesin tonë dhe jemi të bindur që ai do të japë kontribut të madh në arritjen e objektivave tona,” tha Zhdrella gjatë prezantimit.
Në anën tjetër, Çoriq për faqen zyrtare të klubit ka thënë se është i lumtur që rikthehet në Podujevë.
“Kam kujtime të shkëlqyera nga periudha ime e mëparshme dhe mezi pres të shpërblej besimin e drejtuesve të klubit. Do të jap maksimumin për të ndihmuar ekipin në arritjen e objektivave tona dhe për t’i gëzuar tifozët ‘Legjendat’ me fitore të reja, sepse ata me të vërtetë e meritojnë”.
29-vjeçari, Çoriq, ka luajtur edhe në seoznin 2021/22 për Llapin duke mbrojtur portën llapjane në 29 ndeshje.
