Me nostalgji po e sheh vendin ku kaloi një pjesë të rinisë.
Rizah Vrajolli, u kthye edhe njëherë, aty ku punoi e jetoi për vite të tëra.
Veçse asgjë nuk gjeti ashtu siç e la dikur.
Objekti që dikur qe strehë për të, sot është kthyer në gërmadhë.
Në këtë hapësirë, që aso kohe shërbente si hotel, strehoheshin ish-punëtorët e minierës së Novobërdës, që vinin nga vise të ndryshme të vendit.
“Ky ka qenë hoteli ku kanë banuar punëtorët, sidomos ata që kanë qenë vetëm jo familjarë, dhe kjo pjesa këtu zakonisht kanë qëndruar mbikëqyrësit edhe punëtorët që janë marrë me operativë në minierë. Këtu në hotel kanë jetu punëtorë të viseve të ndryshme kushdo që ka punu në minierë, ka pas prej Prishtine, prej Mitrovice”, deklaroi inxhinieri në minierën e Novobordës.
Por muret e plasaritura e dritaret e thyera, s’ia ndryshojnë pamjen e ngulitur në kujtesë.
Ky vend që tashmë duket i harruar, dekada më parë kishte goxha gjallëri.
“Këtu dhe në atë kohë ka pasur edhe aktivitete në muzike, ka qenë salla, pra ka pasur kushte edhe për qytetarët, por edhe pjesa tekniko-organizative”.
Me mbi 60 dhoma gjumi, hoteli, kishte brenda edhe kuzhinën, ku punëtorët hanin vakte të ndryshme ushqimi.
Madje për të, hoteli ka një rëndësi të veçantë, për një tjetër arsye.
“Unë këtu kam mbajt martesën, dasmën në vitin 1983, ka qenë një dimër i vështirë, dhe atëherë dasmat me u mbajt në hotel nuk kanë qenë tradicionale, por e kemi mbajte dasmën që ka qenë prej të rrallave”.
E dasmën, thotë se e bëri edhe me muzikë.
“Muzikë ka qenë Sinan Vllasaliu në atë kohë ka qenë i ri, dhe është një kujtim i mirë sepse Sinani është i kësaj treve”.
Nga hoteli, minatorët ecnin afro një kilometër deri tek miniera, aty ku nëntoka e Novobërdës, numëronte mbi 3700 punëtorë.
“Jeta e minatorit është gjithmonë e vështirë,edhe kushdo qe flet për minatorin ka një ndjenjë të veçantë sepse puna në minierë është e veçantë dhe e rëndë”.
Objekti u ndërtua më 1975-tën, ndërkaq pas luftës, për disa vite u përdor nga UNMIK-u.
Megjithatë tashmë ka gati dy dekada, që objekti nuk përdoret për asgjë.
Kronikë e realizuar nga gazetari, Driton Sadiku
