Asociacioni i Gazetarëve të Kosovës ka kërkuar nga sistemi i drejtësisë që rastet e dhunës ndaj gazetarëve t’i trajtoj me seriozitet, raporton teve1.info
Në shënimin e Ditës Botërore të Lirisë së Shtypit, 3 Majit, AGK i është drejtuar prokurorëve dhe gjyqtarëve me kërkesën që t’i trajtojnë me seriozitet me të madh rastet e dhunës së gazetarëve.
Siç ka bërë të ditur kryetari i AGK-së, Xhemajl Rexha, në pesë vitet e fundit janë regjistruar 120 raste të kërcënimeve ndaj gazetarëve, e vetëm këtë vit 11 sosh, prej të cilave ka veçuar sulmin ndaj gazetarit Valon Syla.
“Rritja e sulmeve ndaj gazetarëve kërkon reagim urgjent dhe adekuat nga ana e sistemit të drejtësisë”, ka thënë ai.
Rexha ka thënë se AGK-ja e vlerëson miratimin e Planit Strategjik për Përmirësimin e Qasjes në Drejtësi, i cili parasheh që rastet e gazetarëve të trajtohen brenda një afati të shkurtër kohor, mirëpo ka kërkuar edhe më shumë punë nga sistemi i drejtësisë.
“Përkundër këtyre zhvillimeve pozitive, shqetësimet tona kryesore mbesin kualifikimi i gabuar i veprave penale nga ana e prokurorëve ndaj sulmuesve të gazetarëve, kryesisht duke përzgjedhur vepra më të lehta penale dhe zvarritja e rasteve në gjykata dhe dënimet e ulëta”, ka thënë ai.
Në Ditën Botërore të Lirisë së Shtypit, ka reaguar edhe Presidentja Vjosa Osmani dhe disa politikanë në vend.
