Shtatë persona të dyshuar për “planifikimin dhe kryerjen e vrasjes” e rreshterit Muhamed Lika janë arrestuar gjatë një aksioni të gjerë policor mëngjesin e së hënës, ka njoftuar drejtori i Përgjithshëm i Policisë së Kosovës, Gazmend Hoxha.
Sipas burimeve të Tëvë1 emrat e të arrestuarve për vrasjen e rreshterit Lika janë: Rejhan Bela, Haki Bela, Edmond Lika, Shkëlqim Kuka, Rilind Murati, Diamant Gashi dhe Vatan Qaka.
Drejtori i Policisë së Kosovës, Gazmend Hoxha dhe kryeprokurori i Prokurorisë Themelore në Ferizaj, Burim Çerkini, gjatë një konference për media kanë thënë se motivet e vrasjes së tij ka mundësi të kenë lidhje me “punën e tij si zyrtar policor”.
“Dyshimet e tona të deritanishme janë se vrasja e rreshterit tonë ka ndodhur për shkak të detyrës së tij zyrtare. Megjithatë, motivet do të qartësohen edhe pas intervistimit të personave të dyshimtë dhe pas ekzaminimit të dëshmive të gjetura. Kjo mbetet të vërtetohet”, tha Hoxha.
