Seanca konstituive e legjislaturës së re të Kuvendit, e cila është caktuar nga presidentja Vjosa Osmani të mbahet më 15 prill, do të kryesohet ngady deputetë, nga ai më i vjetri në moshë dhe më i riu në sallë, raporton KosovaPress.
Në këtë seancë pritet të zgjidhet kryeparlamentari ri, ku përparësi për të propozuar ka grupi më i madh parlamentar dhe zgjidhet me shumicën e votave të deputetëve të Kuvendit.
Nga legjislatura e re, deputeti i Lëvizjes Vetëvendosje, Avni Dehari është më i moshuari, 78 vjet, ndërsa, deputetja më e re është Sala Jashari, 25-vjeçare nga Partia Demokratike e Kosovës.
Dehari ka arritur votat të bëhet deputet për herë të dytë në zgjedhjet e 9 shkurtit nga partia Lëvizje Vetëvendosje. Ndërkaq, Jashari ka kandiduar dhe zgjedhur për herë të parë deputete e Kuvendit të Kosovës.
Në zgjedhjet e 9 shkurtit, deputeti Avni Dehari mori mbi 90 mijë vota. Derisa, deputeten Sala Jashari e votuan mbi 35 mijë qytetarë.
Eugen Cakolli nga KDI duke konfirmuar, theksoi se “Me sa kemi pasur informacione, Avni Dehari dhe Sala Jashari janë deputetë që kanë me udhëheq me seancën konstituive”.
Presidentja e Kosovës, Vjosa Osmani, pas certifikimit të rezultatit përfundimtar të zgjedhjeve për Kuvendin e Republikës së Kosovës, të mbajtura më 9 shkurt 2025 dhe në përputhje me autorizimet kushtetuese dhe afatet ligjore, ka thirrur mbledhjen e parë të Legjislaturës së nëntë të Kuvendit të Kosovës për datën 15 prill 2025, njofton Zyra e Presidencës.
Pas konstituimit të Kuvendit, fillon procesi për krijimin e Qeverisë. Sipas Kushtetutës, presidenti është i detyruar t’i propozojë Kuvendit kandidatin për kryeministër, pas një konsultimi me partinë apo koalicionin që ka fituar shumicën.
Zgjedhjet parlamentare janë mbajtur më 9 shkurt dhe rezultatet nga KQZ-ja janë certifikuar javën e kaluar. Në bazë këtyre rezultateve, LVV ka dalë e para me 48 deputetë, PDK e dyta me 24 deputetë, LDK e treta me 20 deputetë dhe AAK-NISMA e katërta me 8 deputetë.
