Mediumi Euronews Serbia ka raportuar sot se Këshilli i Ministrave i Këshillit të Evropës, nuk e ka përfshirë çështjen e aplikimit të Kosovës, në rendin e ditës.
Lidhur me këto pretendime, teve1.info ka pyetur këtë institucion, i cili ka kthyer përgjigjen e zakonshme se diskutimet e Komitetit të Ministrave janë konfidenciale.
Megjithatë, nga ky institucion kanë rikujtuar se aplikacioni po shqyrtohet nga Komiteti i Ministrave i Këshillit të Evropës, në përputhje me rregullat përkatëse.
“Siç e dini, aplikacioni po shqyrtohet nga Komiteti i Ministrave i Këshillit të Evropës, në përputhje me rregullat përkatëse. Ne dëshirojmë të tërheqim vëmendjen tuaj për faktin se puna dhe diskutimet e Komitetit të Ministrave janë konfidenciale”, ka thënë zëdhënësi Dushan Vojnoviq.
Ndryshe mediumi i njëjtë gjatë ditës së djeshme, thirrur po nga burime diplomatike, kishte raportuar se ambasadat e ShBA-së kishin kërkuar nga Këshilli i Evropës që mos të vendoste në agjendë, çështjen e anëtarësimit të Kosovës në këtë organizatë. Gjithnjë sipas Euronews Serbia, ShBA-ja kishte kërkuar që aplikimi të mos shqyrtohet “derisa Kosova të miratojë një qëndrim më konstruktiv për Bashkësinë e Komunave Serbe, i cili do t’i hapte rrugën propozimin e një marrëveshjeje bazë ndërmjet Beogradit dhe Prishtinës”.
Televizioni për këto pretendime ka pyetur Departamentin e Shtetit dhe Ambasadën e ShBA-së në Prishtinë, gjatë ditës së djeshme.
Kjo e fundit përmes një përgjigjje për teve1.info përsëriti se qëndrimi i ShBA-së është i qartë për themelimin e Asociacionit menjëherë. Sa i përket raportimeve të Euronews Serbia, kanë shtuar se nuk mund të komentojnë “mbi korrespodencën e pretenduar diplomatike”.
“Pozicioni i SHBA-së është i njohur mirë: siç vunë në dukje këshilltari Derek Chollet dhe Zëvendës Ndihmës Sekretari Gabriel Escobar në shkrimin e tyre, koha për krijimin e ASM-së është tani. Përtej kësaj, ne nuk mund të komentojmë mbi korrespondencën e pretenduar diplomatike”, ka thënë për teve1.info zëdhënësja Katherine Judd.
Kujtojmë se në një kolumne të përbashkët nga këshilltari i DASh-it Chollet dhe ndihmëssekretari Escobar, një pjesë e së cilës është publikuar nga ambasada amerikane, thuhet se koha për themelimin e Asociacionit është tani dhe se ShBA nuk do të lejojë një Asociacion i cili cenon sovranitetin e Kosovës.
Këto pretendime, Ambasadori amerikan i përsëriti edhe dje pas diskutimit që u zhvillua në Ambasadën amerikane për këtë çështje.
Ndërsa nga Qeveria po përsërisin vazhdimisht se Asociacioni është e vetmja prej 33 marrëveshjeve me Serbinë që nuk e ka kaluar testin e Gjykatës Kushtetuese. Madje kryeministri Albin Kurti u pat shprehur i zhgënjyer nga Escobar, pasi tha se “ka pritur që ai në Beograd do të deklarojë që, pavarësisht presidentit të Serbisë, Serbia duhet ta njohë Kosovën, në vend se në Prishtinë të thotë se pavarësisht kryeministrit të Kosovës, duhet të bëhet Asociacioni“.
https://teve1.info/lajmet/shba-dhe-kie-nuk-komentojne-pretendimet-per-kerkesen-amerikane-per-heqjen-e-kosoves-nga-agjenda/
