Kompania për Furnizim me Energji Elektrike në Kosovë (KESCO) u ka bërë thirrje të gjithë konsumatorëve që të kursejnë energjinë elektrike, në një periudhë kur vendi po përballet me rritje të ndjeshme të importit të energjisë dhe me çmime të larta në tregun ndërkombëtar.
Sipas njoftimit zyrtar të KESCO-s, gjatë dy ditëve të fundit rreth 50 për qind e konsumit të përgjithshëm të energjisë elektrike në Kosovë është mbuluar përmes importit.
Kjo situatë, sipas kompanisë, po krijon presion shtesë në përmbushjen e kërkesës dhe në menaxhimin e kostove të furnizimit
“KESCO njofton konsumatorët se aktualisht po përballet me rritje të sasisë të lartë të energjisë elektrike të importuar dhe me çmime të larta të blerjes në treg, çka krijon presion shtesë në mbulimin e kërkesës dhe në menaxhimin e kostove të furnizimit. Gjatë dy ditëve të fundit, rreth 50% e konsumit në Kosovë është mbuluar përmes importit. Kjo varësi nga importi shoqërohet me kosto të larta, veçanërisht në një periudhë kur energjia elektrike është e nevojshme edhe për shtetet e tjera të rajonit dhe kërkesa në treg është e rritur. Në këtë kontekst, KESCO u bën thirrje konsumatorëve që të kursejnë energjinë elektrike, sidomos në orët e pikut, në mënyrë që të ulim së bashku nevojën për import dhe kostot që lidhen me të. Kursimi i energjisë është në interes të përbashkët dhe ndihmon në ruajtjen e stabilitetit të furnizimit”, thuhet në njoftim.
KESCO ka bërë të ditur se do të vazhdojë të përcjellë nga afër situatën energjetike dhe të ndërmarrë të gjitha veprimet e nevojshme për të siguruar furnizim të qëndrueshëm dhe të besueshëm për konsumatorët në Kosovë./teve1.info/
