Përmes komunikatës, ZRRE njofton se kërkesa e KESCO-s është arsyetuar me mungesën e mossubvencionimit të zotuar nga Qeveria e Kosovës.
Sipas KESCO-s, nëse nuk merren parasysh rreziqet aktuale, mund të krijohen probleme më të thella financiare dhe të rrezikohet siguria e furnizimit me energji elektrike.
Tutje, në këtë aplikacion thuhet se janë duke operuar me humbje për shkak se Qeveria nuk po i subvencionon energjinë për konsumatorët të cilët shpenzojnë më pak se 800 kilovat në orë.
“Sipas FSHU-së, vlera e subvencionit për periudhën 9 shkurt – 30 qershor 2022 ka tejkaluar shumën prej 32.8 milion euro. Vetëm mungesa e mos-disbursimit të subvencionit tejkalon pragun e materialitetit prej 5% ashtu siç parashihet në nenin 11 të Rregullës për të Hyrat e FSHU-së. Rregullatori në propozimin përfundimtar për tarifat e energjisë elektrike me pakicë kishte marrë parasysh alokimin e subvencionit shtesë prej 10 milion euro sipas vendimit të Qeverisë së Republikës së Kosovës Nr. 05/55 të datës 21.01.2022, si dhe vendimin Nr. 01/60 të datës 05.02.2022, për subvencionimin e energjisë në vlerë prej 90 milion euro”, thuhet në njoftim të ZRRE-së.
Ndërkaq, në komunikatën e ZRRE-së thuhet se shumë shpejt do të vendosin për kërkesën për shqyrtim të jashtëzakonshëm nga ana e KESCO-s.
