Sipas të dhënave të Shërbimit Korrektues të Kosovës, në këtë fillimvit janë parashtruar tri kërkesa për pezullim të ekzekutimit të dënimit, një ka vdekur gjatë procedurës, një është refuzuar dhe për një nuk dihet se si ka vendosur gjykata.
Në vitin 2021 janë parashtruar tetë kërkesa për pezullim të ekzekutimit të dënimit, një kërkesë është aprovuar, dy të dënuar kanë vdekur gjatë procedurës dhe pesë janë refuzuar.
Në vitin 2020 janë parashtruar 37 kërkesa për pezullim të ekzekutimit të dënimit, prej tyre asnjë nuk është aprovuar, ndërsa pesë të burgosur kanë vdekur gjatë procedurës së pezullimit.
Zëvendësuesi i drejtorit të përgjithshëm të Shërbimit Korrektues të Kosovës, Ali Gashi, në emisionin “De Jure”, tha se do të duhej të ketë pezullim të ekzekutimit të dënimit për të burgosurit që vuajnë nga sëmundjet terminale.
Megjithatë, ai u shpreh se deri më tani, nga gjykatat kompetente, në të shumtën e rasteve janë refuzuar kërkesat për pezullim të dënimit për të burgosurit me probleme shëndetësore.
“Në vazhdimësi, ne sipas kërkesave që vijnë edhe nga rekomandimet që vijnë nga personeli shëndetësor, kërkesa të tilla i kemi përcjellë, por nuk kemi mundur të bëjmë një zgjidhje, kështu që ata janë në institucionet tona, janë në institucionet shëndetësore, kështu që në këtë aspekt mendoj që do të duhet bërë më shumë, sepse kemi edhe një numër të tyre që janë të shtyrë shumë në moshë, d.m.th. ka arritur pleqëria e tyre po edhe janë sëmurë nga sëmundjet e ndryshme kronike, mirëpo ne veprojmë sipas ligjeve aktuale në fuqi dhe kemi obligim t’i zbatojmë ato edhe përkundër kërkesave të tyre të cilat i përcjellim në institucionet relevante”, tha ai në emisionin “De Jure” në Tëvë1.
Një kërkesë të tillë që të ketë pezullim të dënimin për të burgosurit me sëmundje të rënda, e ka edhe Behgjet Shala, nga Këshilli për Mbrojtjen e të Drejtave dhe Lirive të Njeriut.
Ai në emisionin “De Jure” theksoi se të burgosurve që vuajnë nga sëmundje terminale pavarësisht veprës penale të kryer duhet t’u mundësohet që të kërkojnë shërimin jashtë institucioneve korrektuese.
“Gjithmonë një ndër rekomandimet kryesore ka qenë që të gjendet një mundësi ligjore që për ata të dënuar të cilët nuk paraqesin rrezikshmëri shumë të lartë, që nuk kanë shumë dënim për të vuajtur, të lirohen përkohësisht apo krejtësisht apo t’u mundësohet që të shkojnë në shtëpitë e tyre në mënyrë që ose të gjejnë një shërim i cili nuk mund të ofrohet brenda Shërbimit korrektues të Kosovës ose në fund të fundit edhe të vdesin në mesin e familjes”, tha Shala në emisionin “De Jure” në Tëvë1.
Për më shumë ndiqeni hulumtimin “Shërbimet shëndetësore në burgje”, i cili po transmetohet në “Tëvë1” dhe “Betimi për Drejtësi.
